Saturday, June 20, 2009

نداهتي و نداهتك

طب كل واحد و له نداهته
محمد عبد الوهاب و هو صغير كان بيروح في اي حتة فيها مزيكة عشان الموهبة اللي جواه كانت بتندهه للمزيكا فين ما كانت؟
طب احنا الملايين المجهولة و لا المليارات اية مواهبنا و اية نداهتنا؟
احلي موهبة في رايي هي الصوت الحلو و المغني او هي دي الموهبة اللي بتجيب لك اكتر شهرة.
المغني دة اروق واحد في الدنيا موهبة ببلاش و من هو صغير و النسوان بتترمي تحت رجليه و الفلوس و الشهرة و لا ابو لهب يا جدعان.
اللي يقرف هي لو بتحب العلوم يبقي قابل امي
لوظروفك كويسة و اتولدت في دولة عدلة و ابوك عرف يربيك بفلوس معقولة و تدخل جامعة كويسة ممكن ممكن و احتمال انك تعمل حاجة و لو صغيرة.
و برضه انتا وحظك ممكن تختار علم بيض ما بيجبش فلوس و لا ليه تقدير.
الكورة جميلة بس لغاية خمسة ة تلاتين و انتا و حظك بعدها.
انا بقي مش لاقي نداهتي كل حاجة عملتها كنت فيها في النص زي اللي رقصوا عالسلم
يمكن باشتغل في حته كويسة و شغلانة محترمة و في دول متقدمة
بس الصيدلي اصلا شغلانة بضان ما فيهاش اي انجازات الا لو انتا في التطوير او الانتاج
و انا بعيد عن كل دة
يعني الواحد هيعيش و يموت من غير اي اثر
في ناس مننا بتندهم حياتهم او الموهبة بس لازم يكون الوقت صح و الظروف كمان صح
عموما عادي كله عادي

4 comments:

Anonymous said...

صباح الخير بتوقيتى
جرعة صباحية من الإكتئاب

فكرنى كلامك عن التطوير و الإنتاج بموقف حصل لى و كنت مقدم على شغل فى مصنع أدوية جديد فى مصر

فصادف ان الى كان بيمتحننى عميد كليتنا السابق و كان يعرفنى

فبيقلى عاوز تشتغل فين
قلتله انا بحب الانتاج و شغله

قالى لا انت تشتغل فى التطويرو الابحاث

قلتله هو فى اصلا ابحاث و تطوير فى مصر

انا معلوماتى ان ابحاث و تطوير يعنى نخترع دوا نطور من دوا مش زى الى بيحصل دلوقت فى مصر نجيب دوا بتاع شركة مالتى ناشوينا و هو حبوب نقوم نعمل منه شراب و كدا بقينا بحثنا و طورنا

او دوا معلق نعمله حبوب !!

بعد شد و جذب و كنت اصلا بكره الراجل دا رفضنى عشان على حد كلامه ,, أصل عماد دا صعب

و طبعا مشتغلتش فى الشركة دى و خسرت مصر موهبتى فى أبحاث الدوا

و حمدا لله بالسلامه

فارس عبدالفتاح said...

انت تعرفة يا محمد ايه موهبتك من وجهة نظري الشخصية وانا اشرت لها في وقت سابق انه لديك طريقة القاء وعرض جميلة جداً يساعدها حنجرة مميزة يستطيع اي انسان ان يميزها من بين الاصوات

وهذا من خلال المواضيع التي كنت تسجلها بصوتك

واقسم على هذا اني لم اجاملك في الماضي ولم اجاملك الان فعلا انا نفسي انبهرت من طريقة القاءك لهذه المادة او بمعنى ادق الموضوع اللى كنت بتتكلم فيه

والله العظيم يا محمد لو انت قدمت برنامج تعليمي او ثقافي او حواري في اي اذاعة او تليفزيون اقسملك انك سوف تكون في الصدارة

يا محمد مفيش انسان ملوش موهبة دي قاعدة عندي

بس الانسان يعرف اية موهبته

يعني انت في كتاباتك بستخدم بعض العبارات الخارجة بطريقة مزح لكن لما سمعتك وانت بتتكلم اسلوبك كان راقي جداً الى درجة ادهشتني

انا فاكر لما كنت بتتكلم عن المغربيات وفكار بالحرف قلت فيه مشكلة في المغربة


كانت هذه الكلمة لها دلالتها بالنسبة لتبيان هذه النقطة بحيث اصطدمت بوعيي وادراكي ورسمت في خيالي الصورة على انها امام عيني النسوان ألعين في الشوارع

مع اني الحقيقة غير ذلك لكن كانت الكلمة معبرة الى ابعد مدى

يمكن عشان انا من الناس الذي لديهم انتباه ووعي وادراك بما يشاهدون او يسمعون او يقرؤون

وعلى فكرة انا مبحبش التملق والمداهنات بس يا محمد وحق لا اله الا الله انا ارتحتلك يعني زي ما بيقولوا اخونا الاسلاميين احببتك في الله دون اي غرض او دون هدف

وربك يديم المعروف اسيبك عشان انا لكيت كتير وطلب لكلك على الاخر

سلام عليكم

mohamed hassan said...

عماد باشا
تحياتي و مساء الخير بتوقيتي هنا
معلش يا عمدة احنا اللي خسرنا
انتا عارف اكتر حاجة بتحزني قوي
لما اشوف الاوروبيين بيساعدوا بعض و بيحترموا الصغير منهم
لو تشوف ازاي بيحبوا الصيادلة الصغيرين و بيحترموهم
و بيقدروهم و كانهم اكتر من اولادهم و كمان لانها امانة التعامل مع المرضى
حاجة بجد تفرح مش الكلاب اللي عندنا
يالا معلش يا عمدة تاني و تحياتي

mohamed hassan said...

فارس باشا
و الله يا فارس انتا هتخليني اتغر في نفسي و اروح
اجري على اي فضائية اقدم فيها مذيع من بتوع الايام دي
يا سيدنا احنا مع بعض بنتكلم و نحكي
و الحمدلله ان الكلام بيوصل المطلوب
و احييك يا اخي بشدة
شفت المواضيع بتاعة هيكل الاخيرة عن حرب ٦٧
و الله يا عمي الراجل دة بيتكلم كلام كويس بس احنا لا نسمع لسة
ربنا يسهل و نقدر نحسن من حياتنا
اجنا نقدر نقول ان في معانا خيط من الضوء
شايفينه
و اشكرك تالت مرة على كلامك
و ان شاء الله نتواصل كلنا في الحقيقة
لما نكون في بلدنا مصر
ربنا هو العالم امتى
بس عسى يكون قريب
شكرا و تحياتي