Saturday, May 02, 2009

المزة الطائشة

الواحد بيقابل كتير و قليل
لكن ما فيش زي المزز بتوع زمان
يا سلام على ايام الثانوي كدة ايام ما البت انجي كانت تنزل الشارع تبهدل الدنيا و الواحد كان يبقى واقف مع اصحابه في الشارع و المزة من دول معدية و خاصة البت انجي دي كانت حلوة جدا بنت اللذينة دي٠
بس انا كنت للاسف مؤدب و كنت باخاف لغاية ثانوي اكلم اي مزة عشان عيب٠
كنت حمار
بس معلش
الواحد عشان كان شوية شاطر و خاصة في اللغات كانت المزز بتبقى عاوزة تتكلم معايا يعني؟
عادي مش حب و كلام من دة بس تعارف يعني٠
بس انا كنت عبيط و باخاف و امي كانت عاملاي رعب انه حرام و ربنا هينتقم منك و هتروح في داهية و مش بعيد تروح ورا الشمس لو غلطت يمين و لا شمال٠
و كل ما مزة تتصل معاكسة حتى تقولها ابني مش بتاع الكلام دة٠
حاكم اصل كنت الكبير و احنا عيلة محافظة يعني٠
ياه كانت ايام٠
بس انا كانت ليا تهيؤاتي لما كنت اروح البيت اقعد اتخيل دا بعد المذاكرة طبعا ان انا بحب البت مثلا شيرين و حياتنا عاملة ازاي و كلام عيب يعني كتير بقى ٠٠٠ مراهقة بقى و حركات٠
بس للاسف و لا مزة من اللي انا حبتهم في خيالي قلتلها انها كانت شريكتي مثلا في حياتي امبارح؟
و لا حتى قلت لاصدقائي الانتيخ٠
بس ساعات كنت انطس في نظري و انقي حاجات وحشة قوي و اخليها مركز احلامي ما اعرفش يمكن حاجة فيها تعجبني و خلاص٠
مزة واحدة في ايام الكلية حبتني و كانت حلوة شكلا بس كانت بنت كلب ما عندهاش شخصية اتجوزت اول عريس جه لها٠
بس كل اما تقابلني تقولي باحبك و انتا روحي و انتا قلبي و اول ما جه العريس قالتلي باحبك بس هاتجوزه
كان عندها ازدواج في الشخصية باين٠
بس اتصلت بيا تاني يوم ما اتجوزت و انا عجبتني قوي في حركة لما قلتلها انتي انسانة متجوزة عيب ما تتصليش هنا تاني ابدا٠
و قفلت و الحمدلله و ادينا اهو بنخبط في الحياة و هي عمالة تدينا على قفانا٠

4 comments:

ramywhynot said...

"المزة الطائشة"
أكاد أجزم -ولاحظ اني مابستخدمش الكلمتين دول الا لما اكون متأكد -انك بتتبع أسلوب اكتب اللي فيه النصيب وزي مايكون بقي وبعد كده تفكر في عنوان يناسب الهرتله دي
:D

عجبتني المقطوعه دي
-------
بس انا كانت ليا تهيؤاتي لما كنت اروح البيت اقعد اتخيل دا بعد المذاكرة طبعا ان انا بحب البت مثلا شيرين و حياتنا عاملة ازاي و كلام عيب يعني كتير بقى ٠٠٠ مراهقة بقى و حركات٠
بس للاسف و لا مزة من اللي انا حبتهم في خيالي قلتلها انها كانت شريكتي مثلا في حياتي امبارح؟
---------

مش بردوه بيحفزوا الواحد انه يذاكر ويجتهد ... اه والله الحياه من غير حب لاتطاق حتي لو كان من طرف واحد

يارب يامحمد تلاقي بنت الحلال اللي تقدرك

mohamed hassan said...

رامي باشا
حقيقة اللي انتا قلته
بس ارجو ان ما يكونش كل اللي باكتبه هرتلة
بس ساعات الواحد من كتر الذكريات بيكتب بسرعة و ما بيلاقيش وقت يعدل شكل كتابته٠
ما اعتقدش ان حد بيعجبه كتابته ابدا
انا باخط دلوقتي الكلام اللي على لساني و اللي انا و غيري بنحكيه مع بعض
حقيقي هو كلام مش منظم بس اهو بنحكي عن حاجات و خبرات يمكن اللي معانا او اللي بعدنا يستفيدوا منها٠
بس مش بذمتك ان المشاعر ايام الثانوية و الاعدادية كانت بريئة جدا
انا من ايام كان اللي بيكلم بنت مننا بيتكسف ووشه بيحمر و كان بيتعصب٠
يالا الحمدلله
شكرا يا باشا و فين تكملة موضوعك على مدونتك؟

ramywhynot said...

لا ياحبيبي فهمتني غلط في كلمه هرتله ..كتابتك جميله ومعبره و الاهم من ده كله انها صادقه علي الاقل بالنسبه لي واكتب اللي تحبه واللي علي هواك

-------
و فين تكملة موضوعك على مدونتك؟
-------
نشكر تقدير سيادتكم للفن الهابط ..ماخبيش عليك انا اساسا كتباتي ضعيفه جدا ...يعني كل واحد المفروض يعرف قدر نفسه وانا عارف قدراتي...بالاضافه الي اني بحب اقرا اكتر مااكتب او اسمع اكتر ماتكلم..نوع من الانانيه بقي او الكسل مش عارف

تصبح علي خير يادوك

mohamed hassan said...

رامي باشا
انا مازعلتش يا رامي في كلمة هرتلة بالعكس هي بتبين ان انتا مهتم بالكلام
اللي انا باكتبه و رايك يا باشا على راسنا من فوق انا فعلا لازم اركز في البوستات بس انا فعلا باحب لما البوست يكون طبيعي زي ما نكون قاعدين مع بعض بنحكي كلنا
عموما يا باشا و الله انا عمري ما زعلت منك و شكرا لك على الاهتمام
و بجد يا ريت تكتب عادي و كتابتك كويسة بجد
اكتب المواقف الحلوة اللي انتا بتقابلها
انتوا في مصر في كنز من الحكايات
خلي بالك الجو بتاع مصر دا مش موجود في اي حتة تانية
اكتب يا باشا و كلنا متابعينك
انا هاجيبلك زباين لحد باب المدونة
و شكرا يا ريس على الردود السريعة
معلش انا كان عندي شيفت متاخر فعشان كدة ما عرفتش ارد بدري
تصبح على خير يا ريس