Saturday, December 26, 2009

تاريخ العرب على النت للشخختي

الفيس بوك ( قسم الحريم العرب)
من كتاب تقسيم بني آدم للشاخخ بن صنانة
قسم التكنولوجيا
فصائل العرب
قسم نسوان العرب على الفيس بوك



إعلم أخي القارئ- أعزك الله - أن نساء العرب على الفيس بوك قسمان.
أولهما
الجريئة و تلك التي تكشف كفها ووجهها بل و بلغت الوقاحة بجزء منهن
كشف شعرهن. و هي تدعى عند المتفتحون من العرب جريئة و شجاعة و كذلك عند الغرب تعتبر عادية.
أما عند بني وهاب و أشياعهم فهي فاجرة فاسقة داعرة و ستحرق بنار جهنم .......كتير كتير .... جداً خالص.
و قد يبلغ بها الجرأة منتهاها فتضيف ذكوراً كأصدقاء و كدة...... و هذا لعمرك لفسق و فجور عند بني وهاب كبير.
و قد رأيت بأم عيني إحداهن تتحدث عن حبيبها و تنشر رسالات غرامهما على الفيس بوك و هذا فسق و عيب و فضيحة عند بني وهاب.
ناهيك عن مارينا
و صور ما يدعى بالشورت و هو لباس تلبسه المرأة و بيبين وراكها كالفراخ الحالقة عند زيزو بتاع سنكوتشات الفراخ المستوردة.
و هي صور بتتعب الغلابة و المحتاجين و الفقراء .
و كذلك صور الطبقات العليا و نسوانهم المزز بالحليب و القشطة و المربى. و يا وعدي على الصواريخ.
و تدّعى أيضاً تلك المتحررة بالسافرة كأنها قريبة للسافلة في تشبيه خبيث من السلفيين.
ثاني بنات العرب
هي الأخت المحجبة المنقبة البربونية
و هذا لعمرك صنف عجيب عجب الزمان و ملحقاته
فهي أخت محجبة تضع صورة للمصّاصّة المغلفة و مصّاصّة بيعّف عليها الدبان و القصد كما نعرف هو ان الفتيات الأخريات ما بيستحموش فلذلك عليهم دبان أو أنها سكر فلذلك أهلها بيلفوها و يغلفوها عشان يجي الأهبل يشتريها.
كذلك فقد تجد إحداهن بين بين فهي
محجبة أو منقبة لذلك لا تضع صورتها بل تضع صورة مزة فاجرة من مزز الغرب كديمي مور أو باريس هيلتون و قد رأيت بأم عيني واحدة تدعى بنت الإسلام و تضع صورة لبطلة أفلام بورنو شهيرة جداً جداً.
و في موضوع الصور لنا حديث فهو خداع و نصب فحينما تضع إحداهن صورة ديمي مور

ثم تفاجأ بأنها شبه
الواد حسنين بتاع نصبة الشاي اللي على أول الشارع

فذلك لعمرك نصب قراح.
رموز الأخوات الملتزمات و إفيهاتهم هي تعتبر محفوظة
من
الحجاب قبل الحساب
إلى
عاوزين ديشليار مسلم عشان نمنع اللي بيفسوا في الحمامات.
إلى
ما تشتريش من الدنمارك عشان بيشتمونا و قلالة الأدب
و أيضاً
حملة إنصر نبيك و صلي معانا خمستاشر ألف صلاة و النبي يمكن الحال ينعدل.
و هي حملات كما ترى أخي القارئ لا تدعوا
إلى العمل بل إلى الدروشة و الدعاء و القعدة في الفسحة و نسيان أي عمل.
هؤلاء النساء هم أناس عاديون و لكنهم مزدوجون الشخصية كعادتنا
و لكنهم أيضاً خفيفوا الدم و هم لا يقبلون إضافة ذكر و لا حجر.
ثم تفاجأ في كثير من الحالات و عن طريق تجارب شخصية بأن الأخت لديها علاقات و معارف
و ان لديها ماض لا يقل ألماً عن كثير من السافرات.
و هكذا تجد نساءنا على الفيس بوك
بين الشرف و الفضيلة
بين التعري و التّجلي
بين النقاب و الغراب
بين أخلاق الغرب و الصداقات مع الطرف الآخر
و بين أخلاق الشرق و عدم التحدث مع حد عشان عيب و كلهم ذئاب يا نادية.
بين الوهم و الخيال
بين الخلقة الحقيقية و الصور المزورة بتاعة المزز الأجانب
بس خلاص
تحياتي الطيبات

Tuesday, December 22, 2009

الغايات و المواقع للمرة المليون

أنا نفسي أفهم إيه الحكمة من وجودنا؟!
إية الحكمة إن أنا إتعلمت و فهمت و خرجت برة و إتعلمت حاجات مهمة و أنا عمري ما هأقدر أنقلها لأهلي المتأخرين عن بقية الدنيا.
إية الحكمة من فهمي لحاجات صح و أنا عمري ما هاعرّف أغيّر حاجة؟
إية الحكمة من وجودي و أنا من بين مليارات كل يوم بيموت منهم كتير و لا حد بيعبّرهم؟
طب اللي بيموتوا تحت الصخور و الأطفال اللي بيموتوا في غزة و غيرها و اللي ماتوا في السيول في الهند و تايلاند و كل البشرية دي لية بتموت و لية بتعيش؟
هل أنا باناقش حكمة ربنا ؟ طب ما هو خلقني و اداني العقل ؟
قولوا لي إية الحكمة من وجودنا و إحنا و لا حاجة بقالنا الآف السنين؟
أنا ما عنديش أمل نغير أي حاجة
كل الدنيا أقوى مننا و ما فيش أمل

Monday, December 21, 2009

Sunday, December 20, 2009

ماذا تريدون من غزة أن تفعل؟!



جدار بين مصر و غزة؟!
لو رأى أحد كابوساً مثل ذاك أن جداراً يقام ليعزل مصر عن غزة لصحا مفزوعاً و بسمل و حوقل ثم رجع يشخّر و يحلم بالوحدة العربية مع طبق من المهلبية!
سيتم ردم الأنفاق و تجويع الناس مرة أخرى؟!
فهل ستقوم غزة من تحت الرماد مرة أخرى؟
متى سيصيبكم اليأس يا غزّاويون؟
هل سيتكلم النظام و بأي عين سينطق المنافقون هذه المرة؟
هل هذه خيانة؟ و ما تفسيرها؟
هل لو قامت الحكومة المصرية بمناورة فقط لإطعام هؤلاء الناس و تبادل تجاري؟!
ما تعودناه من رئيسنا ال..... أنه بنصاحة الفلاحين و خبثهم سيبيع أخوه من أجل مصلحته.
و النتيجة كانت دوماً أنه لا تحققت مصلحتنا و لا مصلحة الأخوه فضاعت مصر في غياهب الظلمات.
جدار عنصري بين أخوه و عائلات.
لا لوم عليكم أيها الإسرائيليون الآن أبداً أنتم أحّن عليهم مننا.
تحياتي.

Saturday, December 19, 2009

في رثاء صديق و رفيق

ربما لم توجد أمة جحدت رجالها كأمتنا التي جحدت جهد رجل كعبد الناصر و الثورة.
أستغرب كثيراً حين أرى شحاتين ولاد شحاتين يقولون عبد الناصر سرق فلوس الباشوات و أعطاها للفقراء.
و كأن أبوهم و أجدادهم كانوا صلطح باشا إبن فلقس بيه.
لولا ما فعله عبد الناصر و الثورة لمصر لكان كمية المتعلمين بأحسن الأحوال لا تقارن بنسبتهم في اوائل السبعينيات.
لولا الثورة ما كان في السد العالي و لا تأميم قناة السويس و لا المصانع و لا الحياة المتكاملة اللي كانت موجودة.
رجاء حار و أنا أحب هذا الزعيم من كل من يذكره أمامي ألا تجحده مقامه و تذكر أنه لم يكن بإمكاننا حتى الكتابة التي تراها الآن لولا مجئ الثورة التي علمت أبي فبتعليم أبي تعلمت أنا و كتبت لك لتقرأ الآن. فهل إستفدنا من الثورة و من عبد الناصر؟
و أرجو من أولاد صلطح باشا و فلقوس بيه و بنات طنط نواعم و هوانم العصر الملكي الكلوباتي و الغارقون في حب العبيد لأسيادهم أن يشوفوا دولة تلمهم.
كذلك مشجعي المقلوبين على وجوههم لقاء السلام المستحيل و معاهدات السلام و إننا حقنا نستريح و نفسي نفسي و الكلام بتاع السادات دة.
أرجو منهم أن يتوكسوا بستين وكسة توكسهم هما و اللي خلفوهم.
تحياتي لروح بطل غيّر من بلده للأمام رغم كل الصعاب
توقيعي
شاب من زمن جمال مبارك مفجّر و مزنجر ثورة سيتي ستارز و بيتزا هت و كنتاكي و جميع سينمات جرين فاميلي.
و مشاهد لمؤتمرات الحزق الوطني في حمامات التلات

في الأصالة مرة ثانية

خاصية لنا في أفراحنا صرف الملايين و لكن ما هي الروح السائدة للبشر التي تحضر مثل هذه الأفراح؟!
أول شئ هؤلاء البشر متكّبرون و متعجرفون فمن يصرف الملايين في فرح و يدعو إليه أحد لابد و يكونوا من أكابر الحرامية و قطاع الطرق بتوعنا المشهورين و رغم ملابسهم الغالية و روائحهم الرائعة و نسائهم المزز
إلا أنه تحت الجلد يختفي وحوش و قلوب من فولاذ قد تقتل طفلاً من أجل مصلحتها دونما إهتزاز رمش لهم.
ثانياً
في هذه الأفراح لا تجد فرحاً أصلياً من القلب كلها مجاملات و إبتسام من تحت الضرس و نسوان جاية تتمنظر و شباب جاي يصطاد برضة.
بعد الفرح بسنة أو إثنان على أكثر التقديرات يحدث المحتوم و الطلاق و يطلع كل فرد منهم إبن حرام مصفي و تظهر الوساخة و قلة الأدب بيناتهم.
عموماً هنا نموذج لفرحين
فرح ما اتصرفش فيه تلاتة مليم بس الفرحة حقيقية
و فرح اتصرف فيه كل ما تقدر تتخيله بس الفرحة ..... و لا بلاش

1-

2-

Friday, December 18, 2009

فصل : في مسألة الأصالة و الرخامة

المكان : مدرسة قاسم أمين الابتدائية
الزمان : أوائل الثمانينات
كل يوم من بدايات دراستي في المدرسة كنت أدعي التوهان و أني لا أعرف الطريق إلي المدرسة إلى أن مر شهران و تعذبت أمي بتوصيلي كل يوم صباحاً
فلما وجدت أحد جيراننا لديها طفل في مثل عمري سألتها ممكن يبقوا أصحاب؟
فردت الولية الرخمة قالتلها: وماله يا حبيبتي و ماله؟
و هكذا حصلت على أول صديق طفل ظريف الشكل و أسمه أحمد يأكل كثيراً و نظيف و يحب معاكسة الفتيات.
أنا كنت أكره المدرسة و اللي عملوها فمن أطفال ببرابير و بيشخّوا على روحهم ، إلى مدرسين مرعبي الهيئة و الأخلاق.
مازلت أكره رائحة موظفين و مدرسين و أساتذة الجامعات لدينا لا أعلم لماذا و لكني أؤمن أنه ليس عن طريق هؤلاء البؤساء سنصل لأي شئ.
نرجع لصديقي هذا من أول يوم تعّرفنا فيه عرفت أننا أصدقاء كنت أشاركه الكلام حول النساء اللي هما بنات في أولى إبتدائي.
شاركته حب فتاة لبنانية جاءت شهر لتدرس معنا ثم رحلت فجأة تاركة قلوب مكسورة كثيرة ورائها.
كانت نكاتنا أصلية و كذلك معظم أصدقائي بعد ذلك كان كلامنا لا يوجد لدى شلل أخرى لأن هزارنا أصلياً
حينما دخلت الجامعة تعرفت على عيال أبضن من البيض.
كانت نكاتهم تقرف و حتى الحديث العادي ممكن يوقعلك البيضتين و تقعد ساعة تلم فيهم تاني.
لم أكن أتصادق كثيراً مع تلك النوعية لأن الواحد مش فاضي و كمان وقاية من الأمراض.
مش عارف لية حاسس إن النوعية التانية دي بقت في كل حتة.
تفتح التليفزيون تلاقي البيض بيتدلدق
تشوف حتى الممثلين تلاقي أومليتات مالهاش حل.
دا حتى الدين بقى في دعاة و شيوخ بنفس الطريقة.
حتى السياسة تلاقي برضة بيض من السوبر ابو صفارين.
بس هو اللي محيرني راحت فين الناس الأصلية؟
فين الناس الحقيقية ؟

Sunday, December 13, 2009

إيران و الغباء و الدهولة المصرية

مقارنة بين إيران و مصر من حيث الأوضاع تجد أن مصر بحكومتها و حكامها الكثيرون الذين لا نعرف من هم الآن؟
تجد مصر دولة مهترئة تعادي حتى محيطها الطبيعي ( الجزائر كحالة حقيقية).
بينما تجد دولة كأيران تمتد حتى حدود إسرائيل بمعاونة حلفائها و حتى لبنان و سوريا.
إيران لا لغة و لا تقبّل لها داخل محيط العرب لكنها تنتشر و تكسب أرضاً كل يوم.
حينما كان أحد المشجعين المصريين يجري داخل السودان و لما دخل أحد البيوت السودانية و أنقذه أصحاب البيت أستوقفه أحد أهالي البيت و سأله : تتذكر مصطفى محمود؟!
طبعاً كان المشجع على الفور يرد بأنه عالمنا الكبير مصطفى محمود و قد توفي في ذلك الوقت تقريباً.
الذي لم يدركه المشجع رغم صمت السوداني أن الرجل كان يقصد الفضيحة التي حدثت عندما ضربت قواتنا السودانيين المرابطين حول المقر الفاشل للأمم المتحدة بميدان مصطفى محمود سعياً لمخرج أو لجوء سياسي لأي دولة ما و قد قتل في ذلك الهجوم عديد من البشر و مات أطفال و رجال.
هكذا عدنا لنقول أخوتنا و أهلنا بينما الجار الحقيقي لا يطلب أكثر من حقه و إلا يكون إنسان بجح و ما عندوش دم.
و طالبنا السودانيين بنسيان أن الجزائريين أيضاً إخوة لهم بس عشان أحنا عاوزين نغلب و يا ريت في حاجة عدلة إلا وكسة و ماتش خرة كورة.
دعك من الكرة قل لي بالله عليك سمعت حد من مسئولينا سأل في الصومال رغم إن هي مسئولية مباشرة لينا بسبب قناة السويس و لازم نأمّن طريق السفن عن طريقها؟
سيبك من دي سمعت عن النيل أهو إبراهيم عيسى صوته إتنبح يقولهم منابع النيل يا جدعان و لا حد حتى عبّره.
بس فالحين يرشحوا لليوفسكو و يسقط و يرجع يرمي ورا لا مؤاخذة ..... ط .. ضهره مشيها ضهره.
أوروبا و علاقتنا بقت خرة و لا بيعبرونّا لإننا بصراحة بضان لا بنهش و لا بننش مالناش لازمة في الجزمة.
أمريكا هي الهابلة الوحيدة اللي معانا زي ما تقول أخوّة حتى النهاية بس هي مروقانا برضة إشي رحلات و إشي ترفيه للباشوات الصغننين و أهو كله تضييع لأم البلد عشان الصغنتوتة إسرائيل.
و الله أنا شايف إن من كتر الضياع ما عدش له لزوم الدلع بتاع أمريكا و إسرائيل دة هما يقولوا عاوزين إيه و هما زي الخدامين هينفذوا و خلاص.
و أهو توفير للفلوس للأمريكان المواطنين.
و هكذا نتيجة الواسطة و أهل الثقة إشربوا بقى
تحياتي

المرشحون الجواسيس

و لو رشح زويل نفسه لأصبح جاسوساً و إبن كلب في نظر أصدقاء النظام.
المشكلة التي وقع فيها النظام أن جمال مبارك حقيقة و بلا جدال لا أثر له على الإطلاق.
يتكلم جمال مبارك و يتحرك و كأنه خيال أو شبح مختفي.
تخيل معي أخي القارئ هذا رجل سخرت له كل الدنيا و لم يؤثر أو ينقل مشاعر حتى لشبشب في مصر.
حينما خرج لهم عفريت العلبة ( البرادعي) بدون تريقة حقيقة وقع النظام في مصيبة فكيف يقف شخص مثل جمالو يا جمالو أمام شخصية حقيقية لا تمثيلاً كالبرادعي.
ذلك مثالاً كشخص يؤجر بلطجية ليمثل على خطيبته أنه بطل فإذا به يقع أمام بلطجي حقيقي ( البرادعي هنا كشخصية حقيقية و قوية و مدمرة لجمالو على بالو)
أتخيل وجه مبارك و هو يرى البرادعي متحدياً و هو دليل على هشاشة النظام البضان الموجود.
كذلك يتحدث شمامون النظام و لصوصه عن طريقة الإنتخابات و الدستور و الفسفور و كأنك تتحدث عن دولة حقيقية و نظام حقيقي.
بينما الواقع في أي شارع فيكي يا مصر أنه لا نظام و لا حكومة و لا حاجة أصلاً.
توقع البشر جميعاً أنه لن يحدث شئ داخل مصر طالما لم يتأثر الرغيف في يد المواطن و يتم تجويع الشعب حقيقة و هو ما قد يقع في أي لحظة في أزمة إقتصادية ما تعصف بمصر
.
حينها ستقف الدولة و يدمر ذلك النظام.
بيد الله لا بيد أحد هكذا كانت الأمور دوماً
صدفة فإنقلاب فثورة فتحرير فحكومة فبضان

Wednesday, December 09, 2009

أسعار بعض المأكولات من ألمانيا

في المتوسط راتب أصغر عامل بألمانيا حوال ألف و تلتميت يورو.
بعض الأسعار عشان تتنقطوا بقى
زيت عباد الشمس واحد لتر = ٩٠ سنت
هامبرجر من ماكدونالدز = ١ يورو
شوكولاتة بنت لذينة ٤٠٠ جرام = ١,٧٥ يورو
دقيق واحد كيلو = ١ يورو
تاكل اجمد اكلة في مطعم و شاي و قهوة و حلبسة = اقل من عشرة يورو
كيس بطاطس عملاق و انتا ماشي في ماركت كله مزز و حاجة آخر فرفشة = ٣ يورو
تقعد على قهوة و تخدم عليك مزة آخر ألاجة = اقل من ٢ يورو.
اللحمة الكيلو بسبعة يورو و لحمة من اللي تاكلها و تطير على طول زي العصافير.
لاحظ ان اليورو يعتبر بالنسبة ليهم بضان اصلاً
يعني اقل من جنيه بالنسبة لينا او يعني و لا حاجة
فين بقي المقارنة بيننا و بينهم بلا وكسة
أغلى بلد في العالم هي مصر بدون منازع

مصر المتقزمة

من أم كلثوم و عبد الحليم و الريحاني و السنباطي و عبدالناصر و تأميم قناة السويس و إسترداد الدول العربية واحدة بعد أخرى من أنياب الإحتلال.
و صلنا لرموز المرحلة الحالية
جمال مبارك و عز و أبو تريكة و مدحت شلبي و عمرو أديب و ضياع العراق و موت فلسطين و ضياع حتى رغيف العيش.
هذه نتيجة متوقعة تماماً
الموهبة كالمصيبة لابد ستنكشف بها يوم من الأيام أو هي كالجريمة لابد أن تنكشف بها.
لذلك حينما وضعوا عديمي الموهبة في كل مكان ضاعت مصر.
وضعوا لنا إبن الرئيس حيث لا طعم و لا لون و لا رائحة و لا أي بتنجان و لا حد عارف الراجل دة مين و لا عاوز إيه؟! بقاله خمس سنين بيتكلم في بضان
و هكذا تجد في كل مكان
أولاد القضاة أصبحوا قضاة و لذلك تجد ماشاء الله البلد القانون فيها من النوع العال العال.
أولاد الظباط بقوا برضه ظباط و لذلك مصر بلد الأمن و الأمان.
يا راجل بتوع الميه و الكهربا بيعينوا ولادهم و مطلعين قانون أبناء العاملين.
هناك سؤال دوماً يتدحرج في ذهني
ماذا لو ولد لأحد الشحاتين طفل موهوب و متميز؟
أين يذهب هذا العبقري لو وجد؟
الذي يحزنني هو الناس الطيبين و الحرافيش أمثالنا
هناك كمية مشاعر في هذا البلد يندر أن توجد في مكان آخر.
و لو أنك هتضيعي يا بلدي و عمرك ما نصفتيني بس صعبانة عليا
يالا معلش
أنا هاتنقل للتاريخ و أم كلثوم و الخمسينات و الستينات أحسن
وحشتني يا عبد الناصر
وحشتنا يا ريس

Thursday, November 26, 2009

كل سنة و انتوا طيبين

كل سنة و انتوا طيبين





Saturday, November 21, 2009

عالم التفاهة

حين تراهم على الشاشة ترى العجب العجاب
بدأها عمرو أديب البشع المنظر و العالي الصوت بقباحة
و قال
الجزائريين يكرهوننا و يجب أن نقاتلهم
قالها الآخرون ببشاعة الأخلاق و بجهالة الغباء و قلة العلم و الأدب و بتطاول على حضارة مصر و تصغير لها
سنجعلها حرب و لنلهب مشاعر البشر
مذيعون رياضيون او هكذا يعتقدون بدون أي علم او خبرة و يجعلون انفسهم محللون رياضيين أيضاً
مذيعو الجهالة و الضياع و الزمن الأسود الذي أصبحت فيه مصر ملعب كرة و اللعيبة هما الرجالة ( يا أخي آحا )
طب و اللي طلع تلاتين اللي جابوهم زينا و أتمقق عينين أمهم في الكتب لما إتعموا يبقوا إية ولاد جزمة مثلاً!
و شعب عبيط عمال يهلل بس برضة الحق على اللي فوق
المهم مصر جهزت نفسها للفوز و بعد ما ضربنا الجزائريين عندنا جم هما و ضربوا اولاد الذوات بالجزمة في السودان لا و الخيبة القوية كمان اتغلبنا
يعني جمال بوز الإخص أبو وش فقر باظت خطته
كان عاوز يتصور جنب اللعيبة و يعمل فيها فاتح القطرين
حقيقة انا خجلان من تعصب المصريين اكتر لاننا كنا دايماً كبار و ما بتفرقش معانا
و برضة حتى لو كنا رحنا كاس العالم كنا هنعمل اية؟!
مش فاهم يا جدعان احنا فريق ترسو الفرق الكبيرة بتعمل على قفانا نقاط و بتحاول تلم على قد ما تقدر لما تقابل فرق زي بتاعتنا
الله يرحم كاس العالم تسعين اللي كنا حداشر لعيب مرزوعين في الجون
و هجمة واحدة يتيمة عملنا عليها افلام
خلاصة
صغرتم فهنتم و تستحقم ضرب الجزمة
أخيراً:
تحيات للاعبين من شخص حاقد عليكم و يكرهكم و ضيع عمره في العلم اللي لا بيودي و لا يجيب و في حياته عمره ما هيعمل مليون واحد من اللي بتعملوه في ماتش واحد
يا خسارة عمر شبابك يا مصر

Saturday, September 26, 2009

لا تعليق

لا شئ يحدث حتى الآن
كل الأخبار بايتة و بدون طعم نفس الأشكال و البشر في السينما و التليفزيون يطلون علينا مع تغييرات طفيفة
أخبار بائسة عن منطقتنا يليها أخبار أقل بؤساً من باقي العالم.
حتى الأفلام الأمريكية بقت بدون طعم فين أيام تيتانيك لما الغيلم ينزل يكسر الدنيا و الناس تتكلم عليه سنة كدة.
ما فيش أفلام عدلة حتى نزلت تعوض الفراغ العواطفي عند البشر.
باكلم واحدة من مصر انا باحس إن الناس في مصر من كلامها إتغيرت .
هي عاوزة تتجوز و خلاص و أهلها هيموتوا و يخلصوا من وشها مش عارف لية حاسس إن أنا هألبس في مصيبة كدة.
عاوز أنزل مصر و نفسي أشوف الزبالة بقى بتاعة الجرايد هل موجودة بجد؟ لو حد يعرف أماكن الزبالة يقولي عشان عاوز أعمل زيارة ميدانية بقالي كتير ما شوفتش زبالة يا جدعان.
أشوف المجاري الضاربة و المية المقطوعة و الكهربا اللي بتنقطع و النت البطئ.
ياه يا مصر واحشاني ......هيك
غير انتا في حروف آخر كلمة
لو حد عنده اقتراحات تانية لكوارث يا ريت ما تبخلوش على اخوكوا يشوفها لو جه مصر.

Monday, September 14, 2009

غشاء بكارة صيني و بخمسة عشر دولار

الآن وصلت الصين لفهم عقلية العرب و تفوقت على نفسها
تخيل أخي السيناريو الآتي
مع هوجة و عمليات التديين من شيوخ البترودولار
تخرج عليهم الصين بصفعة عملاقة على اقفيتهم
غشاء بكارة صناعي و تركيبه في دقايق بخمسة عشر دولار تعود الفتاة عذراء و لا كأنها لسة بالكرتونة
تخيل الجنون حين يتأكد الخبر و يتحاكى الناس عن فلانة اللي كانت لا مؤاخذة بتتطخ في وضح النهار و الحمدلله إتجوزت و طلعت عذراء زي النكتة الشهيرة بتاعة إحدى الممثلات المشهورة بانها بتتظبط لا مؤاخذة و بعدين كان بيقولك عذراء السينما المصرية
فلما سألوا واحد عذراء و لا لأ
قال مش عارف بس هما كل اللي ظبطوها قالوا عذراء
المهم
تخيل أخي- أعزك الله -قصة حب مولعة في الجامعة و البت مش مستحملة
و الواد تعبان ثم يظهر هذا الحل
السحري
ياللمعجزة
و أخيراً زست
دلوقتي أقدر أقول إنه كله هيزيط و الناس بتوع البترودولار هتظهر حقيقتهم
هيظهر الجانب المظلم للمريخ على الارض العربية
هيبان قد اية الشباب مش لاقي متنفس و ان الحياة بنت كلب بؤس
اتوقع و العلم عند الله ان المستوردين الرئيسيين
سيكونون أولاً السعودية ثم بقية الدول العربية
ربنا يكون في العون هنظهر على حقيقتنا قدام نفسنا
مشكلة كبيرة يا رجالة
اعتقد هتبقى امنية كل شاب ان يتزوج واحدة- لا مؤاخذة- متقفشلها بس....ما اتلعبش في اساسها يعني....!
( ضيعت صيام رمضان انا بالبوست دة)

Saturday, September 12, 2009

المسلسل الكوميدي حرب الجواسيس

إوعوا تتفكروا إن حرب الجواسيس أثرت عليا
..... أبسيلنتولي.....
أنا اللي أثرت على حرب الجواسيس
حرب الجواسيس عملتلي دماغ و دماغ جامدة كمان
يعني أنا بقيت بدماغين
إبقوا أتفرجوا عليه مسخرة المسخرة
تحياتي


مزز و مزز تانية و أشياء أخرى

الفرق بين البنت المتربية في العز و المتربية في الفقر
هو بالظبط زي الفرق بين العربي و الاجنبي
البنت المتربية في العز و الغنية النفس مش هتلاقيها في بيوت الدعارة مش هتلاقي في البيوت دي غير فتيات محطمات نفسياً و ذهنياً
و غير كدة هتلاقي عندها مشاكل كتير انا طبعاً مش ربنا عشان احكم عليهم ساعات ظروف البني ادم الخرة بتخليه يعمل بلاوي و ربنا يغفر للناس كلها
البنت المتربية في العز هتلاقي شكلها باين عليه النضافة و العقل و التعقل
المصريين دلوقتي لا باين علينا نضافة و لا عقل و لا تعقل
بص لمزة متربية في بيئة كويسة و بص لواحدة تانية متربية في بيئة خرة
هتلاقي الخرة باين في كل حتة.
لية حتى المتربيين في العز عندنا عندهم حرمان في حتت تانية ؟
تلاقيه شاب غني و ابن ناس و زي الفل و شوية تكتشف انه حمار و متخلف و عبيط
تلاقي بت عسل عسل و غنية و عيلة كبارة و آخر ألسطة و تكتشف آخر حاجة إنها متكبرة و بقرة و لا فاهمة اي حاجة في حاجة
يعني لا الفقير نافع و لا الغني نافع
الله يخرب بيت امك يا اللي في بالي.

Saturday, August 29, 2009

الحياة و الجودة

حياة المصريين عبارة عن مزبلة اليوم؟!
لأننا قبلنا الدونية و كلامنا كله دوماً
بس هو يعمل و يرضى
يا عم كبر دماغك عيش و خلاص
يا عم الحمدلله احنا بنرضى بقليلنا
بس الغلابة تعيش بس

يعني إية الكلام الفارغ دة؟
إشمعنا الريس و إبنه عايشين حياة كاملة؟ و زايطين
و إحنا ولاد كلب يعني؟
إشمعنا الوزرا و حياتهم
إشمعنا رجال الأعمال؟ و حياتهم الرايقة؟
إشمعنا الدعاة الجدد بياخدوا ملايين من كل خرم بيشتغلوا فيه؟

يا نعيش عيشة فل يا نموت إحنا الكل

جمال مبارك مش أحسن مني و منك؟ صح
ولاد الوزرا مش أحسن مني و منك؟
ولاد اللواءات و الواصلين و الحرامية مش أحسن مننا؟
دا إحنا اتنفخنا يا جدعان و طلع عنين ابونا
بعد كدة اي كلب هيكلمني في مصر بتناكة هاضربة بالشبشب
و إنتا كمان ما تسمحش لأي حيوان يكلمك بتناكة
تحياتي
إمتى يطلعلكوا كرامة بقى يا شعب وسخ؟
تساؤل مشروع
من واحد مفقوع

Thursday, August 27, 2009

الأغاني للألعوباني

لماذا حرم الله الأغاني كما يقول الوهابيون؟
و أين في كتاب الله ذلك الذي يقول لاتسمعوا الأغاني
بالأمس كنت أستمع لراديو العربة
ثم جاءت أغنية لرجل يتكلم لغة غريبة و لكن موسيقاها ما زالت ترن في أذني
ربما مشاعره صادقة ربما صوته رائع أكثر من اللازم
ربما ألف سبب و ألف سبب
لكن يا من تحرمون المشاعر و الأغاني ألا إنكم في ضلال مبين
ألا إني أحب الموسيقى و نغمات الآلات و لا أستطيع كرههم مهما قلتم و لا يعقل أن يكون الله حرمهم
بماذا تتواصل الشعوب إن لم يكن بالفن و الرسم و الموسيقى
و الأدب و الجمال
ألا إنكم يا قومي ذاهبون إلى ظلام مبين و ستنزع مشاعركم و كل ملامح الجمال فيكم بسبب وهابية تعتنقونها و شيوخ فضائيات يسحبونكم إلى الدمار
ألا فليرحمكم الله اجمعين

Wednesday, August 19, 2009

العصر العربي

كثيرون من شيوخنا يحلمون و ربما عن توهم او حباً في فقط تقريع الناس
يتكلمون عن اننا كنا و كان اباؤنا الاوائل سادة العالم
و لكن انا لا ارى اي قاعدة لكلامهم
اهم شئ حينما تبدأ الحضارة هو مدى تحضر بشرها
مدى تقدم صناعتك و مدى تقدم فنونك؟
مدى تطور فلسفتك و تفكيرك
مدى تقبلك للآخر و ثقافته
غير ذلك و كلامنا عن الدين و تأثير الدين؟
فنحن إذن واهمون
الدين لله و الحضارة للناس أجمعين
هكذا خلق الله الدنيا فلا تعاكسوا القوانين
لا يبدأ تفوق الحضارة بشيخ عابس يتكلم في غيبيات لا يعرف عنها الآخر شيئاً
و لا يبدأ بوهابية ضيعت مكانة العربي بي الأمم و جعلتهم يعاملونك في كل مطارات العالم كعدو محتمل
و قنبلة موقوتة
لا يبدأ بتقديس لشيوخ تعلموا الدين في كتاتيب تصلح لصنع متخلفين يفتون في فتاوي الحمامات و الكلوتات
لا يبدأ بشيوخ لا يعرفون الآخر و لا لغته و لا دينه و لا تعاملوا معه أبداً ثم يخرجون بكل صفاقة ليقولون
الغرب الزاني و الداعر و الكافر و يلصقون بهم كل نقيصة
لا يبدأ بشعوب تضرب بالاحذية و لا تتألم و انما تتاقلم لتعيش

Monday, August 17, 2009

يا مززك يا مصر

كلمة للشباب اللي بيلعب في العشرين
لو المزة قالتلك مش هاتجوز غيرك في سنة اولى جامعة تبقى كذابة بنت كلب
أنا في واحد صاحبي قالتلوا مش هاتجوز غيرك و لا هاعرف حد غيرك و نفس اليوم بالليل كان كتب كتابها

واحد صاحبي تاني انقح
قالتله مش هاتجوز غيرك و لا هاعرف حد تاني ابداً يا حبيبي و طلعت اصلاً متجوزة واحد غيره و بتكلمه عالنت تقضية وقت و عادي يعني.

واحد تاني صديق اتجوز واحدة برضة من على النت طلعت عارفة رجالة نص الكرة الارضية و النص التاني حاولت تكلمه و عاملة شبكة علاقات مع اشمم مخلوقات ربنا

واحدة تانية اتجوزت واحد من عالنت طلع شاذ ( لا مؤاخذة يعني للمؤدبين يعني بتاع رجالة).

واحد تاني صاحبنا اتجوز جواز صالونات و المزة و اهلها ناس اكابر و عالم ما تسبش الفرض و منقبة و آخر حلاوة
المعلم اكتشف ان المزة لا مؤاخذة عاملة علاقات مع خماشر واحد كدة قبله
و كلها علاقات مش بريئة لأنها متعقدة بس النقطة الوحيدة اللي تحسب للبت دي إنها كانت صريحة وواضحة

مزة من افضل مزز شارعنا اتجوزت باشا من العيال الباشوات و كان بييجي لها بعربيات آخر موديل و فسح اية و سفريات اية؟!!!!
في الاخر المعلم طلع بتاع توظيف اموال و مرمي في السجن و المزة دلوقتي عند ابوها بعيلين
السؤال هو في اية؟ فين الناس الطبيعية؟ اللي بتحب و بتتجوز؟ و عايشة قصة جميلة هادية؟

فين المزز بتوع زمان؟

فين الرجالة بتوع زمان؟

اية القصص اللي تنفع في جرايد الحوادث دي؟

غريبة يا مصر غريبة!!!!!!

Wednesday, August 12, 2009

نقطة تفوق

كل أما أبص على شغل الاوروبيين و مدى نضافته بأزعل على غبائنا و فهلوتنا كلنا مش مصر بس بل كل العرب الجرب
بس مصر بالذات زعلي عليها أكبر لأنها أولاً بلدي
تاني حاجة لأنها بعد تجربة ناصر كان في إحتمال و لو صغير ننجح في يوم ما
طبعا ساداتوا جه و ضيعها و جه بعديه المعلم اللي هدها و طربقها بنطاعة و استنطاع و لزق نفسه في الكرسي لزقة بنت ستين كلب
التقدم مش وهم و لا خيال و لا حاجة صعبة و مستحيلة
بالعكس دا حاجة سهلة و انيقة و نضافة و شياكة بنت لذينة
تحس و انتا بتعمل الشغل انك واد مفتري كدة و انتا بتؤدي خدمة باحدث اجهزة و طبقاً لقانون معين و حاجة آخر ألاجة.
طب هاقولكوا على مثل النهاردة عجبني قوي مش كتير هيفهموه
زبون دخل بروشتتين الصيدلية و الروشتة لشخصين من نفس العيلة و عندهم نفس المرض و دكتورين مختلفين من مكانين بعيدين عن بعض
تبص على الروشتتين نفس الدواء و بنفس طريقة البحث و نفس الجرعة و حاجة آخر جمال
دكاترة قامت بواجبها بحثت و جابت الدواء الصح و جرعة مظبوطة و حاجة تخلي الواحد سعيد و فرحان بالتعامل مع بشر كدة.
عندنا في مصر يبقي نفس المريض و نفس الدكتور و كل مرة يكتبلك دوا غير التاني و جرعات غير محسوبة
و اللي يكتبلك بول الحمار و اللي يكتبلك رقية شرعية و عسل النمل و فسية عفريت محلاوي و حاجة آخر بضان
التقدم سهل و بسيط بس عاوز ردالة
و احنا شعب مش ردالة ياولاد الردالة
تحياتي

Tuesday, August 11, 2009

إقتلوا مصر أو إطرحوها أرضاً يخلو لكم وجه الحضارة

ماذا تفعل لو كنت مواطن عربي ووجدت أنك مثلاً خليجي
و عندما تفتح التليفزيون تجد مسلسل مصري و ممثلين مصريين
تجد التاريخ الحديث يتكلم عن مصر و جمال عبد الناصر و قناة السويس و حروب مصر لإسرائيل
تجد الطبيب مصري و المهندس مصري
و العمال مصريون
و الحضارة العربية أو اللي لغتها العربية بس موجودة في مصر
أقولك أنا هتحس بإية؟
هتكره نفسك و هتكره المصريين و اللي خلفهم لإنك حمار و مافيش لك أهمية غير شوية الفلوس بتاعة الزفت الأسود زي قلبك.
الحقيقة إننا ما كناش واخدين بالنا من الأعداء الحقيقيين اللي من نفس لغتنا و كلامنا و ديننا
و لكن هم هم العدو قاتلهم الله فأنى يؤفكون
عامل زي إخوات يوسف حينما غاروا من أخاهم فذهبوا إلى سوء المصير بما حقدوا و ضمروا من سوء
أنا لا أجد وصف لما يحدث و حدث في التاريخ إلا أن أهل الخليج هم العدو و هم أشد علينا ضرراً مما سواهم
فما أسوأ الغيرة حين تملأ قلب بني آدم

Monday, August 10, 2009

صباحكم أفضل

حينما يفقد الأمل يوجد التحرش
مش عارف بس لما العيال فقدت الأمل في الجواز أو حياة أفضل إبتدوا يتحرشوا بالبنات
موقف صعب للطرفين بس ما يديش الإذن أو حتى تبرير للتحرش
الواحد عاكس بنات و هو صغير بس عمري ما شديت إيد واحدة و لا حتى قلت كلام جارح
آخرها كانت إني ممكن أتعرف عليكي مثلاً
و دا لو في إستجابة من البنت يعني نظرات مثلاً او حاجات كدة
غير كدة كان صعب و عيب
بس اللي مضايقني دلوقتي ان في ناس كتير بتتكلم كلام و بيعملوا العكس و برضة ناس من أصحابي بيضايقوا بنات معاهم في العمل و بيضغط عليها بكلام
غلط إنه بيحبها و عاوز يتجوزها و كلام من دة
حرام يا جدعان حرام
كفاية ظلم لبعض

Sunday, August 09, 2009

الآن حصحص الحق

ألم أقل لكم حينما تنبأنا بنهايتكم؟
ألم نقل لكم أن توسطكم و تقربكم لذوي الحظوة و تعيينكم أصدقائكم سوف يدمرنا جميعاً
فما لكم لا تعقلون!
حينما كسر إبراهيم أصنام قومه فسألوه لم فعلت ذاك يا إبراهيم؟ فحينما رد بأنه فعلها كبيرهم
رجعوا إلى أنفسهم ..... إسمع هذه الكلمة جيداً
رجعوا إلى أنفسهم
حينما أكون في الشارع في القاهرة و أرى سيارة تكاد تدهم أحدهم مسرعة و غير عابئة
أفلا يرجع إلى نفسه و يقول بل أني أنا الظالم.
لا أحد يقولها أو حتى يظنها الآن.
فمالكم كلكم متكالبين على الخطأ كأنكم حمر مستنفرة؟
أرى حسني مبارك أمامي بالتلفاز الآن و يتحدثون عن حكمته و علمه و اداراته الحكيمة
أفلا يرجع إلى نفسه؟ عجباً
أرى سعوديا يستأجر عامل مصري بثمن كالعبد و يناقض صلاته و قوله أفلا تعودوا إلى أنفسكم؟
أرانا ندافع عن الإسلام و نحن أحط الناس فيما بيننا قولاً و فعلاً و تقديراً لبني آدم
ألا سحقاً لنا عباد الله الظالمين
أرانا نصلي و لا صلاة و لا صلة لنا و نتقول بالكلام المفرغ و كأننا على أحط عقل رجل فينا
أفلا ترون ما أنتم فيه أفلا تبيدوا فينصلح الكون
ألا سحقاً لأقوام كريهة و بشر لا يعقلون
اقول قولي هذا و ادعو لكم الله ان يريحكم جميعاً
و ان يبدلنا بأقوام أفضل فإنا مجبولون على الشر
و آسف لمن يجرحه الكلام

Wednesday, August 05, 2009

سعر بني آدم

لما كنت باشوف أفلام و أقرا التاريخ عن أيام العبودية و ان ممكن تشتري بني آدم و تخليه عبد عندك بشوية قروش كنت باحمد ربنا إن مافيش عبودية دلوقتي
بس حظي الزفت إني باشوف دلوقتي رجوع العبودية و إستغلال حاجة البني آدمين
يا عالم ياهوه في بني آدمين في الخليج بتعيش بالف ريال في بلاد الحراميين.
طب بلاش دي عقد صيدلي في الكويت اللي هما يعني يهود العرب و اوعى وشك و الكلام الجامد
عارفين كام ٤٠٠ دينار و منهم هتصرف و تاكل و تشرب و تعيش بقى
يعني من الآخر .....a7a
الظاهر ان في حياتي القصيرة على هذا الكوكب هنشوف مصايب و انهزام و تراجع البشرية تاني لعهد العبيد
أنا حزين لينا و ليكم و لبلدنا و للعرب الجرب
هو دا آخرنا يعني كدة؟

Monday, July 20, 2009

ليلي و نهاري

ليلي و نهاري على ناري بابات حيران
الواد تامر دا أغانيه معقولة و لو إنه بضان كسخص يعني
المهم
كنت باتكلم مع مزة من ضمن المزز الطايشة في البلد دي
فبتقولي انتا باحس إنك لو نزلت في وسط الغابة عادي هتتصرف و تعيش بس لو حد مننا راح في أي حتة هيضيع
أنا في نفسيتي قلت ما هي دي حسنة عصر مبارك إننا بقينا نتكيف مع أي مصيبة و نمشي زي الجزم.
أنا قلتلها دا أنا وحش صغنن و هناك في مصر في وحوش بجد عايشين بفشل كلوي على فشل كبدي على فشل دموي و كل انواع الفشل اللي تخطر على بالك.
البت ما كانتش مصدقة قلتلها بكرة تشوفي يا بنتي دا إحنا بعد كدة هيجيبونا في قناة ناشيونال جيوجرافيك
او ديسكفري.
بصي يا مزتي العزيزة (البت عليها جوز عيون يخلوا العفريت يتوب)
بصي إحنا أهم حاجة فينا إننا معتزين لسة بكرامتنا
و لسة في ناس عندها أمل و دي حاجة صعبة الى ابعد الحدود
بس هو ابن الوسخة يغور و احنا نبقى زي الفل
ربنا يسهل

Sunday, July 19, 2009

أشكال هندسية

كل أما يبدأ الشفت بتاعي في الصيدلية ببقى مغموم و متضايق كأني رايح أتدبح عموما يمكن عشان كنت طول عمري باتدلع في الشغل في مصر ايامها كان الصيدلي لسة مهم يعني و لية قيمة لحد ما.
بس العجيبة العيال الباقية اللي بتشتغل في الصيدلية.
العيال عندهم نشاط و قوة يا معلم تهد جبال يعني اللهم لا حسد يعني....
تلاقي البت مزة من الصواريخ العابرة للمجرات و جمال و حلاوة و حاجة كدة مفتخرة و بت الجزمة شغالة في الصيدلية زي الإكس و لا القطر التوربيني بتاع زمان.
باتخيل مزة زي دي لو متربية في مصر كانت زمانها بقت ملكة يخدمها كام شاويش من المزز الفقر اللي عندنا.
يا راجل دا البت اللي بتنضف و بترص الدوا صاروخ جو ارض البت كل ما تبصلي قلبي بيترعش و اقعد افكر افكار مش ظريفة خالص و لما تقولك صباح الخير باحس بعصافير و وورد ماشي كدة على الهوا حاجة كدة آخر جمال.
الأكل و الله بيفرق الأكل الكويس تلاقي الصحة عال و الجمال عال العال.
المزة هنا كأنك واخد بطيخة عالسكين حمار و حلاوة و فرد طايش تحس معاها بالدنيا و جمالها
ما اعرفش ممكن المصرية تكون كويسة بس في وسط التلوث النووي اللي عندنا دة هتجيب واحدة عدلة منين؟
اللي هتلاقيها تررللي و اللي هتلاقيها متسرطنة جاهزة
و اللي هتلاقيها ما فيهاش صحة و حاجة آخر تعب
عموما أنا كمان متربي في مصر وواخد ختم التلوث على قفايا فنبقى لو اتجوزنا انا و وواحدة مصرية
زي العيان اللي اتجوز ميت
و نخلف عيال سحاليل و مسلولين

يا جدعان تخيروا المزة العفية و القوية اللي فيها صحة
لان ما حدش عارف يمكن ابنك عاوز يشتغل في صيدلية فيها اجانب فيقدر ينافسهم لما يكبر و تكون صحته كويسة
سلام بقى اما الحق في مزة جاية تشتري حاجة باين
تحياتي

Friday, July 17, 2009

كيف تصبح مشهوراً و بربوراً

في بلدنا ممكن ترسم لنفسك طريق الشهرة بحركات قرعة بس عاوز مساعدة كام واحد قريبك و تبقى اشهر من نار على علم.
و اللي عملها صح هو عماد اديب و عائلته
كل ما يتكلموا على عماد أديب يقولك الأديب و المفكر و المثقف و اللي ما حصلش ا/ عماد أديب
و صراحة أنا مش شايف له أي دور غير تكريس الإستهبال و الصياعة في خلط البزنس بالفن و الأدب
و عماد الدين أديب لمن لا يعرف هو سمسار و صاحب خبطة بيع كل تراث مصر السينمائي للخليجيين.
فكانت ضربة معلم و قناص محترف يعرف كيف يأتي بالقرش من فم الأسد.
عموما هما العيلة دي بتخلط المواضيع فتخليك محتار بس في الآخر هما بيطلعوا بالقرش و خلاص و دي أهم حاجة.
عمرو أديب مثلاً لما بيتكلم على حسني مبارك تحس مثلاً منافق بيتكلم إحترامات و سلامات و نفاقات بنت كلب.
و بعدين يعملك شوية على العيش و المية و الظلم يا حرام و الناس.
و يجيبلك آراء عبيطة من أي مجنون
بيلاقوه في مصر
و الدنيا ماشية و السبوبة ماشية و آخر حلاوة
عاوز تبقى مشهور
خلي خمسة ستة من عيلتك يتكلموا عليك بصفتك المثقف و اللي ما حصلش
و لما تقعد مع الناس اتكلم بألاطة و بيّن إنك بتفهم الكفت
بس ..……خلاص

Thursday, July 16, 2009

سنجفة على السريع

هيصة و مولد هو دا اللي بيدور في مصر
نسوان على رجالة على صايعين على عالم ما يدرا بيها الا ربنا
و بين دا كله بتلاقي مزز موجودة و حاجات حلوة برضة ما نقدرش ننكر دة
حياة بتتشقلب و عالم بتطلع فوق و ناس تانية بتنزل تحت......... ممكن أكون شوفت جزء من دة في حياتي
تقلب الناس من فوق لتحت و من تحت لفوق.
الدنيا كبيرة بس في مصر غدارة قوي و برضة مهما كان لما بتقع في مصر دايما بتحس بقمة الفشل.
مش عارف لية بس الفشل في مصر له طعم ابن كلب مر زي العلقم.
يمكن عشان الفقر اللي في مصر فقر دكر لا شفت و لا هاشوف زيه ابداً
الفشل في مصر عامل زي ما تنضرب ببنية حديد في اسنانك و تتكسر
عامل زي صوت العضم و انتا في وسط الحادثة و هو بيتكسر و يطقطق.
مش عارف لية لكن لما فشلت في مصر كنت باحس باني دخلت في جدار خرسانة لا نافع فيه حفر و لا تكسير من غير ما يكون معايا ازميل اللي هو واسطة حلوة كدة يعني.
و بما ان ما كانش فيه ازميل فأنا خدت زمبة بنت حرام
و باقول للريس حنتيرة
بقى كدة تعملها فيّا.............. ترقعني الزمّبة ديّا

Monday, July 13, 2009

اختار طريق

بما اني من اللي رقصوا على السلم فباطلب من اصدقائي هنا تفتوتي برأيكم أعمل إية في حياتي؟
أنا زي ما أنتوا عارفين صيدلي و باحاول اكون الشاب الروش المتعلم و المهاجر برة و كدة.
بس دلوقاي الناس كلها بتفكر في المادة و بصراحة شغلانة الصيدلي دي مش جايبة همها هنا.
مسئوليات و رعب و خوف و الصيدلي مالوش اهمية زي الدكتور و حاجة آخر بتنجان.
و كمان المرتب بعد الضرايب و المصاريف بتلاقي نفسك شحات.
هو الحمدلله انا احسن من ناس كتير جدا
بس المهنة الحرة يعني الواحد لو فتح مطعم او مغسلة
او حاجة كدة هيكسب ان شاء الله قد الصيدلي مرات كتير
بس المشكلة طبعا شغل حر يعني خمستاشر ساعة كل يوم شغل و ما فيش حياة اجتماعية خالص و لا هتشوف مراتك اذا اتجوزت يعني!
و لا عيالك برضة هيشوفوك
مش عارف افضل صيدلي و لا اقلبها بقالة و مطاعم؟
محتاج رأيكوا بجد يا عالم!!!!!!

Sunday, July 12, 2009

رجوع الشاب إلى نسائه

ما فيش احسن من المصرية كزوجة او اللي عارفة طبعك و حياتك و كل بلد اتربيت فيها لابد لك من زوجة منها
الحقيقة المزز في مصر دلوقتي العملية بتاعتهم بقت صعبة جدا
لان احنا بنربي البنت على انها لبيتها بس و دا بقى مش نافع دلوقتي لان الحياة بقت زبالة زي ما انتوا شايفين فاللي ما بتشتغلش و مأمنة نفسها بيطلع عين اللي جابوها
عموما انا بيصعب عليا لما بالاقي شباب معفن بيستغل ان فعلا في ازمة جواز و يضحك على واحدة غلبانة نفسها تتجوز و يبقى لها بيت
و عموما ربنا بينتقم من الاوساخ اللي بيعملوا اي حاجة وسخة لبنت غلبانة
عموما ربوا عيالكم على الاحترام و بالذات البنت و خليها تعتمد على شغلها و نفسها
بالنسبة للبنات و الولاد اللي ليه نصيب في حاجة هيشوفها يا جماعة و الجواز قسمة و نصيب في الاخر
بيضايقني ان البنت بقت بتعرض نفسها بطريقة مذلة
و اهم حاجة اصلا في الجواز هي الكرامة و خاصة للمرأة اذا ضاعت فسلام على حياة البيت
الله يخرب بيتك يا ريس حنتيرة

Friday, July 10, 2009

نقطة نظام

حلمي اني اشوف عندنا نظام دوا زي الموجود في اوروبا و لو ان عارف ان عندنا حمير كتير هتعارض
و في بقر كتير قاعد بالمرصاد بغباء يا إما باستهبال عشان يضمن لابنه و ابن ابنه مكان في الهيصة
نفسي.......
يبقى عندنا مصنع بينتج من مواد عالية الجودة مش زبالة المواد الخام الصينية و الهندية و تكون اسعارها برضه معقولة
نفسي.......
يبقى في قوانين حقيقة للصيدليات و نظامها و طريقة صرف الدواء و ساعات عمل الصيدلي و الكومبيوتر في الصيدليات و نظام تأمين حقيقي للكل.
نفسي.......
يبقى عدد الخريجين مناسب للسوق و يقفلوا الصيدلة الخاصة و نظام الاستهبال و المحسوبية.
نفسي.....
حد يدينا حقنا في ادارة النقابة و يبقى لينا دور كشباب في النقابة و وضع القوانين و تنظيم سوق الدواء
نفسي.......
الاقي مرة لكلامي اثر او حد يعبرني لاني بانفخ في قربة مقطوعة و لاخر مرة هاقول احنا ضعنا جدا جدا جدا
و لازم نحاول نلم الدور شوية
نفسي.......
كلنا ناخد اجور صح و يبقى في امل من وظايفنا و مرتب حقيقي يجوزك و يعيشك مستور زي الناس الحقيقية
نفسي....
احس اني بني آدم زيي زي ابن حسني مبارك و ابن احمد عز و ابن اي باشا من باشاوات مصر
نفسي.....
في واسطة و لا كوسة تدخلني في وسط ولاد الحرام اللي بيلهطوا في البلوظة و رايقين روقان تام دول
نفسي.....
احس بالامان و ما اخافش على نفسي و اهلي و حياتي و ما ابقاش مهدد كل يوم بالنزول لمستوى الشحاتين او تحت الارض من قلة الفلوس
نفسي.... و انتا نفسك في اية؟

فشخرنا و كلمنّا أجنبي

هو اية الوضع بالظبط يعني عدى على البلد مليون احتلال و لا اتأثرنا؟!!!!
دلوقتي كل واحد يعمل محل ان شالله عربية كبدة و لا
كشك ينقي اسم اجنبي ابن حرام
ليا واحد معرفة عامل سنترال في تلات عدد تليفون و جهاز كمبيوتر و كام عدة موبيل جربانة و مسمي نفسه
وائل كوميونيكشينز اند كونيكشنز ليمتد
في اية يا جدعان و اسامي المدن و المنتجعات
كانك في بريطانيا الحصبة
و بعدين ما هو يا تبقوا انجليز يا تبقوا عرب جرب
انما كدة ما ينغعش يا ولاد
دخلت فيلم في مرة و السينما كان فيها عيال الظاهر جامدة
الولية بتكلم العيل اللي على اليمين بالانجليزي و اللي على الشمال بالفرنساوي و اللي قدام بالايطالي
و انا ورا كلمتني بالاسكندراني و شتمتني هاهاهاه
مش فاهم الناس كلخا بتحترم لغتها و احنا ولاد كلب مافيش اي احترام
لما حد يكلمك انجليزي تاني قله الله يرحمه المرحوم
كان بيخدم عند ناس اكابر من حواري شيكاغو
البضان بضان سيبك انتا

Thursday, July 09, 2009

إنها الشهرة يا عمرو

يييييييييييياه على الشهرة و سنينها و الفضائيات
حقيقة الناس هتتجنن من الفضائيات و الجرايد
شوف اي موضوع في بدايته كدة و خلينا نضرب مثال بموضوع مروة الشربيني اللي ماتت في حادثة مؤسفة بالمانيا و حقيقة مالهاش علاقة لا بدين و لا اي موضوع من اللي احنا عملناه دي واحدة كانت اشتكت واحد و خدت تعويض و الراجل آه غلط فيها لكن كان محروق طبعا من التعويض و الفضيحة اللي اتفضحها
و بعدين سنه كام سنة؟
حاجة و عشرين سنة يعني في عرف الالمان طفل لسة
المهم اول ما موضوع مروة دة طلع ابوها قالك جوزها لسة بيحاول يعمل الماجستير بقاله ست سنين !!!!!!!!
و هي طبعا ما بتشتغلش لانها اكيد ما عادلتش بس طبعا الحجة الجاهزة
الاضطهاد و الحجاب يا رجالة
و عشان محجبة يا عيني ماحدش بيعبرها و دة طبعا كذب و فشر
بعد شوية قالك جوزها بيعمل دكتوراة و راجل ممتاز ممتاز
شوية هي بقت باحثة و بتبحث و حاجة آخر الاجة
شوية و ابوها بقى ضيف على كل حتة و الراجل الحقيقة مش مكدب خبر كل يوم يزود حتة جديدة للقصة و كل يوم نجاح جديد لمروة و جوزها
و الله الفضائيات بتجنن حتى لو عندك مصيبة الناس بتحب الزيطة و خلاص
يا جدعان حرام جوزها راجل على قده بيبحث بقاله ست سنين في ماجستير يعني مساء الفل
و هي كانت مقضياها في المانيا جنب جوزها يعني اسرة عادية جدا
دا غير ان في اسئلة كتيرة ازاي ست سنين و لسة الدولة بتديله فلوس؟ و منين بيصرف على عيلته و مبلغ الاعاشة يادوب عالقد.
و نقابة الصيادلة زعلانة عالجريمة المرة ....آه يا بلد
و سايبين جرايم كل ثانية بتحصل بطول البلد و عرضها
من اول عدد الخريجين المهول
لشكل و نوعية الخدمات المقدمة و طريقة صرف الدواء
و نوع الدراسة و نوعية المواد الخام و المصانع
يعني مصايب في كل حتة و زعلانين قوي على واحدة ماتت مع كل الاحترام بس في حادثة برة
الحقيقة مساء الفل
انتا الحشيش بتاعك نوعه اية ؟
ابقى قابلني

Tuesday, July 07, 2009

في قضية مروة الشربيني

قضية عادية بتحصل و هتحصل لم يكن إلا واحد كاره للعرب و المسلمين خصوصا ( اللي هما نسمة و لا بيسرقوا أوروبا و لا قاعدين على مرتبات البطالة و لا صايعين و لا حرامية و لا نصابين و آخر صياعة هنا في أوروبا) و بعدين في قناة العربية التلفيقية قال الصيدلانية مروة كانت بتقول لأبوها إن هما ما كانوش بيشغلوها عشان مسلمة و دة طبعاً كذب و إفتراء
لأن الشهادة المصرية بتاعتها تبلها و تشرب ميتها على الريق و ما فيش حد في أوروبا ممكن يشغلها بيها أبداً
و بعدين ما حدش عارف إيه اللي حصل إنتوا لية بقيتوا متسرعين كدة و عاوزين جنازة و تشبعوا فيها لطم
و بعدين جوزها بقاله ست سنين في ألمانيا و لسة هياخد الماجستير إية الدولة المهزأة دي اللي واحد يقعد ست سنين في ماجستير و تفضل تديله فلوس ست سنين!!!!!! إية الكوسة دي!!!!!!!
الماجستير أصلا هو سنتين....... بالكتير يا جماعة
و شهيدة ماشي..... شهيدة بس في ملايين محجبين زيها
في اوروبا و بصراحة ولاد ستين كلب و قارفين الناس و حرامية و عايشين على قفا الناس هنا
و يجب عليكم أولاً تعرفوا نتيجة التحقيق و بعدين نتكلم
و باقول لأبوها و الفضائيات بطلوا فشر و كذب عالناس ربنا مش هيسامحكوا يا كذابين

Monday, July 06, 2009

يا صيدلياتك يا هولندا

دلوقتي اعرف خمسة من اصحابي الصيادلة المتخرجين معايا بيبيعوا مخدرات علني!
مشكلتهم فتحوا صيدليات من ام تلاتة تعريفة و كانوا مؤمنين بمبدأ الصغير بكرة يكبر و الواحد يبدأ بتلاتة مليم و بكرة يبقوا ملايين و الحقيقة ان الكبير كبير
و الصغير هيفضل صغير دا إن ما إنسخطش بقى ميكروب مثلا
طب تعال بص على المصريين و الله العظيم الناس بقت شبه الميكروبات من كتر القرف.
المهم واحد من الخمسة الصيادلة بتوع المخدرات دول فضل صابر اول ما فتح الصيدلية و فضل صابر...... صابر....... و بعدين فضل. صابر...... لغاية اما واحد اصغر منه ببتاع خماشر سنة كدة كان لسة خريج امبارح من صيدلة خاصة و راح الواد فاتح صيدلية من ام خمسة ستة مليون حتة واحدة و ابوه رزعه فرح ببتاع اتنين مليون كدة.
الواد صاحبنا كان عارف الشاب دة و عارف مخه متركب ازاي؟ فلما شاف ان يعني أحا ما فيش فايدة
قلبها مخدرات و الحمدلله ربنا كارمه آخر كرم و عدى دلوقتي و إتجوز و خلف عيال زي العسل و ناوي يطلعهم بتوع كورة
و ربنا هاديله مراته و عياله.
فعلا حلم كل شاب صيدلي بيبيع مخدرات.
و كل الصيازلة اللي بيبيعوا مخدرات بيسلموا علي ماما سوزي وبابا حوحو و ولدهم جوجو و بيقولولهم الحمدلله ربنا يبارك فيكوا و فينا و في بلدنا

Sunday, July 05, 2009

ولاد المجنونة

حبيبي لو كنت عند ولاد المجنونة خللي بالك من نفسك يا روحي.
عند ولاد المجنونة ممكن تكون ماشي في الشارع تهفك عربية و انتا حتى عالرصيف يا ضنايا فخللي بالك و ما تمشيش عازرصيف بتاع ولاد المجنونة.
برضة يا نور عيني و انتا هناك ابقى خللي بالك ما تشيلش حاجات غالية و تمشي لوحدك بالليل و لا معاك موبيل غالي و تمشي في حتة مقطوعة ممكن يقطعوا رقبتك عشان عشرة جنية ولاد المجنونة دول.
ولاد المجنونة كتير يا ضنايا منهم الاهبل و العبيط و التبت زي اللي ماسكهم و منهم المتخلف اللي حظه ان ابوه واصل فتلاقيه ماسك وظيفة مش لايقة على امه فمتزعلش لو لقيت نفسك مضروب بالشبشب لان هي يا واسطة يا اما مافيش حل.
و انتا عند ولاد المجنونة تخش مطعم حسك عينك تاكل لحمة لحسن ما تضمنش دي لحمة مين؟ كل خضار و انتا كمان شاكك فيه.
مية ولاد المجنونة يا عيني عليها كلها فيطامين و بروطين اوعي يا ابن الجزمة تهوب عليها.
مستشفيات ولاد المهبوشة دي بقى يا سعدك يا هناك لو وقعت فيها خدمة اية و تكييفات اية و دوا اية بس
لو وقعت هناك هابقي اوزع عليك كحك في مقابر اورومبا
ابن المجنونة معتز بنفسه و عايش الدور سيبك منه
يا ولدي طريقك مسدود بزلطتين
ولدي لا تذهب لولاد المجنونة دلوقتي استنى و خلاص

منتخب المتدينيين



منذ اللحظة الاولي لتسجيله الهدف ينطلق محمد ابو تريكة ليسجد لله شكرا و تنطلق الجماهير العربية فرحة
و ينطبق داخل نفسيتهم اكثر و اكثر احترام هذا الرمز الجديد
انه منتخب الساجدين يا رجال
مرحبا بكم في عالم الرموز الدينية من جديد
و لكن مهلا دعنا ننطلق الي البرازيل هناك يتسائل ميخائيل ماالذي يفعله المصريون هذا؟
قيل له انها علامة الشكر لرب المسلمين و هكذا يفعلون؟
ميخائيل ايضا يلعب الكرة
تحدث مع زملائه لنصطحب صليبا كبيرا لنشكر الرب في الملعب
و لكن ماذا عن النرويج
هناك ماتسو يقول انه يعبد الشيطان و سيصطحب دمية كبيرة للشيطان ليشكرها اذا حقق هدفا في اي مباراة
اذا نحن في الصين
يان سي يقول انا عابد لبوذا ليسوا احسن مني هؤلاء
المسلمون دعني احبك يا بوذا في الملعب عندما احقق هدفا ما سوف اجلب معي تمثالك لاسجد له في الملعب الاخضر
اذا خبر سنة الفين و خمسة عشر في الصفحة الريلضية
مقتل العشرات عندما سجد الصينييون لآلهم في وسط تجمع مسيحيين و مسلمين
بالهنا و الشفا
يقول القرآن الحكيم
و كذلك جعلناكم أمة وسطا لتكونوا شهداء على الناس و يكون الرسول عليكم شهيداً
و تفسيرها الا تكونوا متطرفون في اظهار دينكم و مظاهره و ان تتوقعوا رد الفعل من الاخرين ايضا بالمثل
و هكذا انقلب المستطيل الاخضر لمسجد و معبد و كنيسة و مكان للسحرة و المتنطعين
تحياتي

Sunday, June 28, 2009

تبريز البروايز في تركيب البهاريز

أنا مستشار و إنتا هتبقى مستشار زيي دا آخر كلامي ليا أنا و أمك.
بهذه الكلمات أنهي والد أحد أصدقائنا حياة إبنه حيث حدد له مساره بمنتهى القسوة
و لكن الذي حدث ان الولد حقيقة انتحر يأساً من والده و توفي في ريعان شبابه.
و اصل الحكاية
ان حسام صاحبنا دة كان اكتر واحد شفته في حياتي موهوب في المزيكا
في عمري ما شفت
فنان كدة الولد دة كان بيسمع مقطوعات
و كان بيعزف بيانو بمهارة يمكن تتفوق على اكتر مما تحكي عليه التواريخ.
انا ما بافهمش قوي في الميوزيك بس الواد دة كان فعلا
لما بيعزف كان بيغير حالتنا النفسية و حتي و هو في ثانوي كان بيحط مقطوعات
من تأليفه و الغريبة انها كانت بتخلينا نعيط و نضحك و نفرح و نبلم.
ما اعرفش بس فعلا كان رهيب و موهبة عملاقة
و كعادة كل الموهوبين كان شخصيته رقيقة زي النسمة
و لما ابوه حكم عليه بانه هيبقى مستشار ما استحملش
و اتوفى او يعني انتحر بعد موجة رهيبة من الاكتئاب.
هكذا يحدث عندنا في مصر كل يوم ربنا يوزع الارزاق على الناس .......حاكم المواهب دي رزق من عند الله
و لكن الناس تأبى ذلك
الا و لازم ابني يكون دكتور طب يا ستي ابنك عاوز يبقى كهربائي؟
اخص الله يكسفك
......كهربائي......
يا جزمة و انا اللي تعبت معاك و ربيتك و الله لو بقيت كهربائي و لا اعرفك.
و هكذا تجد بلد كلها متركبة غلط الميكانيكي المفروض دكتور
و الدكتور المفروض حرامي
و المذيع المفروض مسجون
و اللواء المفروض بواب
و الوزير المفروض سمكري.
في الاخر
اهو كله علي كله لما تشوفه قله.

Monday, June 22, 2009

في المسألة التعليمية : إبن الأبلة

كنت في الإبتدائي باستعجب من ابن الناظر بتاعنا
حاكم احنا كان عندنا ناظر متجوز اتنين و مخلف عيل
كان قدنا و هو الناظر يعني عنده بتاع ستين سنة مستريح تقريبا قبل المعاش بحاجة بسيطة.
الواد كان المدرسين بيشجعوه و ما بيضربش و كنا كلنا نتذنب و هو رايق و كان ساعات بيهدد المدرسين.
بس الشهادة لله مصر لم تنهار كما الآن كان في مدرسين كانوا بيضربوا الواد ده بالجزمة
ساعات مش كتير بس كانت بتفش غليلنا
و كانت امه برضه زيادة في التنكيد علينا مدرسة في نفس المدرسة يعني واد مزدوج الواسطة حاجة كدة متكلفة.
المهم انا من يومها اتربتلي عقدة ابن الأبلة دة.
و احنا صغيرين أبلة عواطف و إبنها
و إحنا كبار أبلة سوزان و إبنها هاهاهاهاها.
في الجامعة ما كانش إبن الأبلة بقدر ما كان ابن الجزمة.
كان دايما في عيال واصلة جوة الجامعة.
ما أعرفش إزاي بس أكتر مجتمع ظالم و حقيقي كان مجتمع الجامعة
العيال كانوا مقسمين نفسيهم فلاحين لوحدهم و باشوات لوحدهم و في النص الجزم و اللي انا طبعا منهم.
الفلاحين بيذاكروا و بصراحة ما كانوش مندمجين مع حد.
الباشوات وسايط و دروس و حركات بقى.
احنا بقى يوم معانا فلوس و ايام فقر و ضنك كتير بتعدي.
انما اللي كان غريب عمر الاغنيا ما اعتبروني زيهم ابدا
الفقرا كانوا دايما كرما معايا.
الاغنيا عمرهم ما كانوا كرما معايا ابدا
لية مش عارف يمكن وشي فقر
الدروس كانت علي ودنه و العيال الاغنيا طبعا ضامنين النجاح
اسوأ مكان و أسوأ ناس هما اللي كانوا أغنيا أيام الجامعة
دكاترة الجامعة برضة كانوا منتهى الظلم و الغباء
عمر ما واحد كلمني من الدكاترة تحس انه خايف علي مصلحتك او حتي مصلحة البلد.
حقيقة الحمدلله انني هربت منهم يخرب بيت ابوهم
و بصراحة معظم الخراب اللي احنا فيه هما ليهم يد كبيرة فيه
..... آه عارفين فين إبن الأبلة بتاع ابتدائي
شغال على توك توك بدون اساءة لبتوع التوك توك لكنه
حياته باظت بسبب ابوه و امه للاسف دمروه.

Saturday, June 20, 2009

نداهتي و نداهتك

طب كل واحد و له نداهته
محمد عبد الوهاب و هو صغير كان بيروح في اي حتة فيها مزيكة عشان الموهبة اللي جواه كانت بتندهه للمزيكا فين ما كانت؟
طب احنا الملايين المجهولة و لا المليارات اية مواهبنا و اية نداهتنا؟
احلي موهبة في رايي هي الصوت الحلو و المغني او هي دي الموهبة اللي بتجيب لك اكتر شهرة.
المغني دة اروق واحد في الدنيا موهبة ببلاش و من هو صغير و النسوان بتترمي تحت رجليه و الفلوس و الشهرة و لا ابو لهب يا جدعان.
اللي يقرف هي لو بتحب العلوم يبقي قابل امي
لوظروفك كويسة و اتولدت في دولة عدلة و ابوك عرف يربيك بفلوس معقولة و تدخل جامعة كويسة ممكن ممكن و احتمال انك تعمل حاجة و لو صغيرة.
و برضه انتا وحظك ممكن تختار علم بيض ما بيجبش فلوس و لا ليه تقدير.
الكورة جميلة بس لغاية خمسة ة تلاتين و انتا و حظك بعدها.
انا بقي مش لاقي نداهتي كل حاجة عملتها كنت فيها في النص زي اللي رقصوا عالسلم
يمكن باشتغل في حته كويسة و شغلانة محترمة و في دول متقدمة
بس الصيدلي اصلا شغلانة بضان ما فيهاش اي انجازات الا لو انتا في التطوير او الانتاج
و انا بعيد عن كل دة
يعني الواحد هيعيش و يموت من غير اي اثر
في ناس مننا بتندهم حياتهم او الموهبة بس لازم يكون الوقت صح و الظروف كمان صح
عموما عادي كله عادي

Saturday, June 06, 2009

الأمل

الأمل خارج بلادي موجود
الأمل داخل بلادي مفقود
دوما حين تقارن بين حياتك داخل بلدك و أي دولة أخري تجد فارق الأمل٠
هناك في مصر عامل سئ و هو انعدام الأمل٠
هناك رزالة و تباتة من أصحاب الحظوة في افقاد الأمل لدى الموهوبين بالذات لكي يتفوق أولادهم الحمير٠
رأيت كثيرا من دكاترة الجامعات يحاولون افقاد المتفوق أمله لكي يعينوا قريب او ابن لهم او حتى ابن اخت ما هي اصلا جامعتهم عادي٠
الشرطة مثالا يدخلها اولاد الشرطيين و المتخلفين اصحاب الحظوة فماذا ترى من تطورات عليها سوى زيادة و زيادة في الغباء و الغشومية٠
النيابة كمثال تعيينات واسطة و كوسة مالهاش حل و ماذا تكون النتيجة بالطبع آخر جمال؟
الآن ترى في مجلس الشعب مومياوات تتحرك كفتحي سرور و صفوت الشريف في الشورى٠
اين قانون المعاشات لماذا لا يطبق على الراقدين على قلوبنا من المقابر٠
ككلمة قالها احد الظرفاء لو طبقنا قانون 65 سنة للخروج من المعاش كل القيادات الحكومية و التشريعية هتلاقي نفسها في الشارع٠
واحد تاني بيسأل اية مصر دي اللي كل حكومتها و رئيسها و شلته فوق التمانين اية انعدام الحياة دة٠
معروف ان في وزراء شباب فوق الخمسين ماشاء الله٠
و في بيلعبوا في الاربعين و شوية٠
بس النظام العام هو عراجيز عواجيز عواجيز٠
اقول لبلد العواجيز
الله يخرم بيوتكوا
فقدنا الأمل خلاص

بلد العفريت

عندما تأتي فقرة الحديث عن الذكريات في حياة أي مشهور ليتكلم عن الأستاذ عبد الفتاح مدرس اللغة العربية او الاستاذ محمود السعيد مدرس العلوم فإن ذلك يأتي على مخي دائما بالازبهلال٠
لأنني صراحة لم اصادف أي مدرس عدل حتى الذين كانوا يشرحون بما يقولون انه الضمير فالأمر مختلف تماما حين تذهب الى الدرس الخاص يا حبيبي٠
قلما تجد نفسك امام مدرس حقيقي ربما هي المادة او ربما هو الضعف العام الذي اصاب التدريس ايضا٠
بصراحة جيلنا ظلم لأن كل قدوتنا كانت ناس بيض٠
ما فيش حد كان عدل الا طبعا الريس كان قارفنا في كل جرنان و التليفزيون و انا طبعا زي ما كلكوا عارفين باحب الريس قد اية؟؟؟
كان في مدرسين يمكن متمكنين من مادتهم شوية او معقول لكن ضغوط الحياة خلتهم كلاب سعرانة بتنهش في لحم الناس الغلابة٠
كان في طبعا المتدروشين و المتأسلمين اللي كلهم و الله كانوا ضعاف في مادتهم و حاجة آخر قرف٠
الدرس الخاص كان بيفتح عالم جديد من حياة المدرس للطالب و بيقربك للمدرس و حياته اللي هي طبعا زي حياتنا٠
ربما كان في مدرسين ادين لهم بالشكر لكن غضبي على الجميع يمنعني من الاعتراف بالفضل لاحد٠
عذرا مدرسيني و مدرساتي كلكم ولاد كلب٠ الا مدرس الالعاب اللي ضربني مرة عشر عصيان فهو ابن ستين كلب٠

Wednesday, May 27, 2009

اعتذار عن بعزقة هذا البلوج و موضوعاته

أنا عارف إن البلوج دة مش منظم و الافكار بتلف ساعات لفات غريبة و العناوين بتروح هابداك على موضوع مالوش علاقة بالكلام أساسا٠
بس معلش أنا هاحط خطة خمسية للبلوج دة ليظهر بمظهر حضاري و ينافس على كأس شمبانيا٠
أعذروني لأن أنا باكتب زي ما باتكلم و الواحد من ساعة الازمة الاخيرة دي و هو دماغة بقت في قفاه٠
في موضوع التعليم في راجل ضيع عمره فيه اسمه وحيد عمار ابقوا اقروله٠
اهو الراجل ده يعني خد على قفاه برضه٠٠٠٠ وا وحيداه٠٠٠٠
نرجع لموضوع البعزقة بصراحة يا إخوان أنا مش عاوز افوز بجايزة هوبل للمدونات بس عاوز اقول اللي جوايا فهلخبط بقى و خلاص٠
اصل انا زهقان من النظام و المقالات العلمية و الكتابة المحفلطةو التزام المواعيد و الدقة بتاعة المهن الطبية دي٠
فبارجع معاكوا نشرب من نيلها و شوية نغنيلها و كدة يعني٠
معلش بس انتوا عارفين ان انا كويس و ارجو ان انا اقدر اوصل اي فكرة تقرب الكلام٠
آه بالنسبة للناس الفقرا و الاصل ٠٠٠ هو اية المشكلة ان الواحد يقول انه كان من الناس الفقرا او حتى العادية او حتى المطحونين٠
طب بصوا البلوج دة بتاع واحد على باب الله
ما اعرفش انا مش شايفها عيب قوي ٠
ما معاكش تشتري شوكلاتة كادبوري النهاردة بكرة ربنا يفرجها و تشتري شوكلاتة٠
اية يعني الواحد يموت عشان ما كانش عارف يشتري شوكلاتة؟
انا كان كل اللي بيضايقني ان آخر يوم قابلت فيه المزة كنت مش معايا و لا تعريفة قعدنا في الشمس لما البت قفاها اتسلخ٠
و انا كنت عاوز اروح اشرب ميةو اتغدي و انام٠
ايام بؤس بس ما كانش فيها احساس بالقرف زي دلوقتي٠
ماشي
سلام للناس كلها

ربما فقدنا البوصلة

ناحية الطالب
في اورومبا و الدول المتشقلبة الطالب له حق الاعتراض على المنهج٠٠٠٠؟
نعم٠٠٠٠٠ نعم ٠٠٠ ايها الاساتذة المحترمون هناك في آخر العام و بعد الامتحان مباشرة ما يدعى بالتقييم العام و هي الآن الكترونيا يبعث لكل طالب رأيه في المادة التي درسها و مستوى الامتحان )سهل -صعب( و رأي الطالب كبني آدم له حق ما٠
ثم تجمع هذه الآراء لفحصها و اذا كان المدرس مقصر يعاقب و ينفخ فورا و حالا٠
هذا عن الدول المتشقلبة أما عن الدول المتشخولة كبلدنا الكريم فهاكم التالي٠
الدكتور في الجامعة الحكومية عامل فيها مركز و مفكر نفسه ظابط مباحث و ما حدش يكلمه لحسن مشغول ٠٠٠ مشغول ٠٠٠٠مشغول٠
افهم بس على اية نفختهم مش فاهم ٠
يتحكم في المادة من ناحيته طبعا و ناحية الطلاب انما رؤسائه بيدولوه على قفاه لو حصل بينهم و بينه اي مشكل٠
لا في تعليم و لا أي معلومة عدلة و هجايص يا بلد الهجايص٠
و لا في حتي اساس للكتابة في المجلات بتاعة الكشافة بتاعة اوروبا مقال محترم٠٠
موضوع الكتابة العلمية دي ابقوا فكروني عشان فضيحة بنت ستين كلب٠
انا اعرف ناس اساتذة في صيدلة و طب و لغتهم حتى العربية ممكن تدخلهم بيت العدل مستريح٠
واحدة دكتورة في صيدلة دلوقتي سقطت في التويفل ست مرات ٠٠٠ ست مرات يا كفرة٠
آخر ما زهقوا منها ودوها روسيا طبعا كلكوا فاكرين روسيا اية النظام هناك؟ بالنسبة للاجنبي تنجح لو حضرت كام مرة و لو روحت كتير تجيب تقدير٠
بالنسبة لينا في صيدلة كل كام يوم يقولك عملنا دوا للكبد و دوا للفيروسات بتاعة الكبد تبص على المجلات العلمية و لا حرف واحد٠
يا اولاد الجزمة امال بتصيعوا علينا لية؟
عاوز ابقا اكلمكوا على مخترعاتهم برضه فضايح يا ولدي فضايح٠
المهم آدي يا عم بتوع الجامعة و العلماء اللي بيقولك عليهم مستوى ابتدائي من المعدل بتاع زمان٠
ضياع و صياعة عالغلابة زينا،
ربنا معاكوا يا اولاد
و لسة٠٠٠
انتظروا البقية٠٠٠
٠

Monday, May 25, 2009

تعقيب على التعليم

Uploaded by www.cellspin.net

الحقيقة المرة

ترددت كثيرا قبل الدخول في هذا الموضوع
لكننا إذا أردنا الحقيقة فعلينا أن نكتب و أن نظهر الحقيقة و لو كانت مريرة٠
أتكلم هنا عن مستوى العلوم بمصر و خاصة على مستوى الجامعات
و ذلك بناء على تجربتي الشخصية و التي لا يستهان بها٠
لماذا لا يستهان بها؟
احدكم يتساءل و هو محق
و آخر يقول و انتا يعني على راسك ريشة٠
اقول لهؤلاء الخنازير الصغار
انني واحد عادي من الشعب لم الجأ في حياتي الى الواسطة ابدا
و تربيت في ابشع الظروف من تعليم حكومي و مداوس عامة
تقرف الكلب الحزين
، و لكني نجحت في عبور البحر كالعجل في بطن الزير٠
لا احب الكتابة المطولة و خاصة الموجهة لنصح حكومتنا
او حسني بيه لعلمي انهم لا يقرأون يا ولدي٠
إلا انني و تقمصا لشخصية هيكل اكتب لاناس قادمون ربما بعد قرن او يزيد٠
لعلهم يتعلمون يا ابني لعلهم يفهمون يا عمي٠
محاورنا في هدا الحديث تتكون من هيئة التدريس و الطلاب ربما و كذلك دور الوزارة٠
لنبدأ على البركة٠
" الدكتور سامي العدل الاستاذ المساعد بصيدلة منوف -منوف ليس بها صيدلة و لكن تخيلا يعني-
يبدأ يومه بمراجعه ما سيقول في المحاضرة
و هو نفس المنهج للكيمياء الطبية منذ حوالي عشرون عاما
و الذي درسه على يد الاستاذ الدكتور حسان البهنساوي٠
الدكتور سامي ادخل بعض اسماء الادوية الجديدة
فقط لذر الرماد في العيون على المنهج المهلهل٠
د٠سامي حضر الدكتوراه في الاتحاد السوفيتي السابق
و حصل عليها بعد عناء اللي هو
حضوره الصبح في الجامعة و مرواحه بعد الضهر٠
الدكتور سامي حضر دكتوراه في روسيا و لا يفقه حرف روسي٠
حتى اللغة الانجليزية عنده في البلالا٠
إذن سامي ليس دكتورا معتدا به في اي جامعة عالمية٠
سامي لا يهمه هو لديه طلابه و مريديه و يستعد للترشح لمجلس الكلية٠
سامي بيرسم الدور على المحيطين دوما و عامل اشاعة انه مكتشف دوا جديد٠
سامي حقيقة حزين لانه داخليا ربما لديه بذرة التعلم و التفوق لكنه النظام يا صديقي٠٠لكنه النظام٠
لدي سامي بعض الطلبة اللي ييجي منهم بس على مين
لو مالهمش واسطة يبقى يشوفوا قرد يشموا لا مؤاخذة مؤخرته٠
سامي لدية سارة المدرس المساعد بصيدلة و هيثم بيحضر ماجستير في الصيدلة غصبا و عدوانا
و هو بيشم كوكايين اصلا بس هيبقى دكتور يعني هيبقى دكتور هكذا قال والده٠
سامي بيختصر فلوس من الابحاث لحسابه زائد بعض النقود من هنا و هناك٠
لا تنس ان سامي كان يعطي دروسا خصوصية في صباه٠
كذلك العرب القادمون للحصول على ورقة الدكتوراه ياله من كنز عظيم يا سامي٠
سامي يرى المهنة تتدهور و لكن ماذا يفعل و هو نفسه السبب
يريد ان يعيش سامي يا جماعة٠
سامي دكتور عظيم و يكرم من رئاسة الجمهورية البطيخية في عيد العلم هاهاها ٠
و هكذا تمضي يا سامي من علو الي علو هكذا حياتك انت وحدك تحكم في جامعتك
٠

Tuesday, May 19, 2009

واجب عزاء

أحب أن أقدم واجب التعزية لأسرة الرئيس محمد حسني مبارك
في وفاة حفيدهم
لأنه رغم كل المشاكل و المعارضة فإننا آدميون٠
اللهم ألهم أسرته الصبر و السلوان

إبراهيم

"فنظر نظرة في النجوم فقال إني سقيم"

ملاحم اغريقية

حياتنا هي سلسلة من ملاحم اغريقية دائرة بداخلنا
ادور في سلسلة مفرغة من النجاحات و الاخفاقات
احزن لنجاحي وسط فشل كل المحيطين و نظراتهم الحاسدة٠
اخفاقات على الناحية الاخرى من المحيط بسبب طمع الآخرين و تطلعهم لمستويات اعلى من الحياة٠
كأني ارفع صخرة ثم تهوي مجددا لتحطم عنقك و عنق من تحبهم و ليبدأ الألم من جديد٠
تطلعات و آمال و مشاعر متدفقة ربما تكون في مكان خاطئ و لكن من يدري؟
لا ريب ان الله قد خلق الانسان لحكمة ما٠
لا ريب انه هناك حكمة من وجودي في هذا الكون و لكني لحظات لا أعرف ماذا يراد مني؟
لا ريب ان حياتي مؤثرة على نحو ما ربما و لكن كثيرا اظن انه لا تأثير٠
كذلك فما الذي تغير من وجودي او عدمه فهاهي الحياة تسير و ملايين البشر مطحونين و معذبين و كثير منهم لميتون جوعا٠
مالذي تغير منذ جئت و مالذي أستطيع عمله؟
لاشئ٠٠٠٠٠٠ نعم انت محق
٠

Saturday, May 16, 2009

أحدث الشتائم

_وحياة أمك لأوريك يا إبن المتلخلخة_
أحد البراعم و هو يحدث صديقه في المحمول ضاحكا
و قد ابتسمت ساعتها لأن مصر دايما هتفضل ولادة
عمار يا بلدنا

أرض القوم الظالمين


دعاء نوح على قومه
رب إن قومي ظلموا أنفسهم فأنزل عقابك تمحوا أناس ظالمين
٠رب لا تذر على الأرض أقواما فاسقين٠
ربنا إنك إن تذرهم يضلوا عبادك و يلدوا أناسا فاسقين أمثالهم
٠رب إن قومي علوا في الأرض و أذلوا عبادك إنك أنت العلي الحكيم٠
ربنا و إن كانوا يحملون دينك فإنهم أضلوا السبيل
و أستذلوا بعضهم و كانوا قوما مجرمين٠
ربنا و أرنا آياتك و اعف عنا
و إغفر لنا إنك أنت العفو الرحيم
٠

Tuesday, May 12, 2009

أليس منكم رجل رشيد؟

حقيقة لا أدري ما الذي يقال عن تفكيرنا و قرارتنا الآن٠
قرارات كثيرة تتخذ اليوم بعشوائية و غوغائية مرعبة؟
مما يجعلك تتساءل حقيقة هل نحن حمير أم بقر؟
*حين تجد الجميع متحدين ضد ذبح حيوان لم يسبب الأنفلونزا و يدور في دورة تنظيف المدينة و لا يلحق هذا القرار حتى ابسط قواعد المنطق من اجراءات احترازية و تعويضية٠
* حين تجد أحكام قضائية من قضاة أبسط وصف لهم هو الغباء المطلق حقيقة و لاحظ أن القضاء الايام دي بتطلع منه خوازيق بنت ستين كلب و هذا ابلغ دليل على تأثير الواسطة في التعيين - مرحبا بكم في عالم القضاة العبط - مبروك يا اولاد٠
* كنت اعتقد لوقت قريب ان لدينا مفكرين و علماء بس الحقيقة يا رجالة ان يعني ما فيش الكلام دة الدكاترة بتوع الجامعة و المتخصصين اللي انتوا شايفينهم دول حمير و بقر و دي حقيقة بجد و لسة هتشوفوا ياما٠
*يدفعك هذا الجنون المستشري لتوقع الاسوأ أليس كذلك؟
إسمع يا سيدي
توقعي أنا هو
مصر بالكتير قدامها سنتين و تقع وقعة بنت كلب
فوضى و دمار شامل٠
هل أنا باتكلم عن معرفة ؟
لا بس الموضوع ماشي بسرعة حلوة يعني و النهاية سهل رؤيتها يا حبايبي٠
نصيحة
إلحق خد لك ساتر٠

احتقار البشر

من بين اوجه الظلم الاجتماعي في بلادنا
هو نظام الاجور و كيفية تحديد الاجر؟
كنت باشتغل في صيدلية في حتة راقية و كان جنبنا محل كباب و كفتة٠
صاحب المحل راجل كويس و كان شغال عنده رضا٠
رضا على قده و يعتبر بسيط التفكير يعني٠
رضا كان بياخد يومية خمستاشر جنيه لو في ضغط شغل٠
ما فيش شغل كتير هو و ظروفه٠
رضا كان عنده عيلين و حياته بؤس و مراته كل يومين تهرب و تسيب البيت و العيال٠
ما كانش بيسألها راحت فين و لا جت منين لما كانت بترجع٠
كانوا غلابة و بؤس البؤس اللي في الدنيا كلها٠
ما اعرفش حصلهم اية دلوقتي بس اكيد في اهوال هما عايشينها دلوقتي٠
جنب المستشفى هنا يسكن جورج٠
جورج عنده تأخر عقلي و بيتكلم بصعوبة٠
جورج هو مسئول النضافة و التنظيم هنا٠
جورج بيعمل شغله باتقان و بيحبنا كلنا و روحه مرحة جدا و صديق لي شخصي و بيحكيلي عن قصة حبه مع جميلة٠
جميلة تعتبر زي حالة جورج بس بتشتغل في عمل مكتبي بسيط في مكنبة عامة٠
بيحبوا بعض و هيتجوزوا و سعداء
كل ما اسمع جورج و اشوفه افتكر رضا و ابتسامته الخفية و تفكيره رغم بساطة عقله في مستقبل عياله و تمنيه دايما ان ربنا يريحهم و يموتهم٠
عشان هو مش هيعرف يربيهم٠
تحياتنا يا حكومة٠

Saturday, May 09, 2009

نشوة المغامر

حينما تكشف قلب المفاعل النووي بتشيرنوبل رأيت الشمس أمامي و كأنها تناديني لأنطلق لعالم الأحلام٠
كانت الأرض من حولي حمراء بلون برتقالي رائع و قلب المفاعل يتوهج كما لو كان الهيدرا القاتلة أو النداهة٠
شعرت بشعور رائع و أنا أخطو للداخل و أخلع خوذتي و أنا أري مئات الألوان تتصارع من حولي لتنسج لوحة رائعة ، لقد كنت في قلب تلك الشمس التي أراها عن بعد و كنت عاشق لضوئها أيام عملي في الحقل مع أبي٠
لقد كنت عالما نوويا و أعلم بينما أخطو للداخل أن مئات المليارات من النيوترونات و البروتونات تمزق جسدي و ذراته و أنني سأموت بأسوأ أنواع السرطانات و التشوهات٠
كانت خلاياي كلها مدركة لذلك و لكن كل جسدي كان يود فقط التمتع بتلك الكرة البرتقالية الساطعة و الألوان و النعيم٠
كنت أعلم بينما أخطو للداخل أنه ما من بشري غيري سوف يدفع حياته ثمنا لهذا المشهد الرائع٠
و لكني ربحت لا أحد غيري رأى تصارع الذرات في الكون و تقاربها و لمسها كما فعلت٠
٠٠٠٠امم نعم لو عاد بي الزمن سأفعلها ثانية٠٠٠
انت لا تدري ما هي روعة ذلك الضوء و الاقتراب من الخطر و التمتع بقمة المغامرة٠
لقد اكتشفت أرضا جديدة كما فعل كريستوفر حين رأي امريكا أو حينما رأى دارون جزيرته٠
٠٠٠٠ لا لست نادما انا مغامر و قد دفعت ثمن متعتي٠٠

قاعدة ذهبية

لا تصدق أحدا مهما ادعى امامك المعرفة٠
لا تصدق المسئولين لدينا في انهم تعبوا و كافحوا حتى وصلوا للمناصب٠٠٠٠٠٠ لعمري انه لكذب قراح يا سعفان يا ولدي٠
لا تصدق شهاداتهم و أسماؤهم اللامعة ٠٠٠ الدكتور فلان و البروفيسور علان ٠٠٠ فكلها فساكونيا يا صديقي ٠٠٠ فلتنظر حولك هل لو لديك عدد خمس بروفيسورات حقيقيين اتعتقد انك كنت لتعيش في هذه المزبلة؟
لا تصدق ادعاؤهم التبسط معك في الحديث و ان كلنا فقرا ولاد فقرا فالحقيقة الموجعة انك جزمة و لو صادف تحدي حقيقي سيقولون لك الحقيقة عارية - من غير كلوت بكيني حتى- ٠٠٠٠ صدقني و جرب لن نخسر شيئا٠
مثلا حاول ان تتقدم لابنة زيلونير منهم و لنر ماذا سيحدث يا صديقي٠
اخي المواطن
انت جزمة هذه هي الحقيقة
لنقف جميعا امام المرآة و نهتف
انا لن اكون جزمة بعد اليوم٠٠٠٠٠ممكن شبشب يعني٠ هاهاهاهاهاها

Friday, May 08, 2009

عالم من المجانين

دايما كلمة دانتي لوصف الجحيم بترن في دماغي
-أيها الداخلون إلي هذا المكان فلتدعوا ورائكم أي أمل-
هكذا اصف لاصدقائي الخنازير الاوروبية حياتنا
فلتدعوا ورائكم كل امل؟
هنا٠٠٠ عالم الجنون
تكون عبيطا و ذو واسطة قد تصبح وزيرا ٠٠٠ممكن لية لأ؟٠٠٠
تكون حمارا و و تصبح رجل اعمال يشار اليه بالدولار و الدينار ٠٠٠٠٠جائز جدا٠
تفعل ما يجب لتصعد درجة او حتى نص درجة ما فيش و كأنك يا ابو زيد ما غزيت و لا رحت و لا جيت٠
مرحبا بكم في عالم الجنون٠
هذا هو عالمي حيث ولدت و اتروقت٠
هذا هو رئيسي يلعب على كل الحيل الطبية ليعيش و يحمكني حتى آخر فسية سيفسيها٠
هذه هي مراته ٠٠٠٠سيبكوا منها لحسن دي قراشانة٠
هذا هو ولده مثال التفوق و العبقرية بالواسطة هذا هو ابلغ مثال لكي تفقدوا اي امل٠
هؤلاء هم رجال الاعمال اصدقاء الشعب الجميل بتاعنا٠٠٠مثال آخر٠
هذا هو شارعي و هذه هي مواصلاتي٠
هذا هو انا ٠٠٠باضحك زي العبيط عشان الصورة تطلع حلوة٠

عادات غريبة

بقالي يومين سايب تفاحة و معذبها عشان آخر تفاحة من كيلو التفاح اللي انا كنت جايبه من اسبوعين٠
كل شوية تبصلي و ابصلها٠
تقولي ها هتاكلني النهاردة و تروح تجيب تفاح جديد و لا اية ظروفك٠
اروح مفكر شوية و اروح سايبها لظروفها و انساها خالص لغاية تاني يوم نفس الحوار٠
دايما انا آخر حاجة من اي حاجة هي اصعب حاجة٠
و انا صغير كنت ايام المدرسة - و لو اني ما كنتش باطيقها- آخر يومين كان بيوحشني الصحاب و اللمة٠
ايام الجامعة آخر يومين كانوا اصعب حاجة - كنت باودع المزة بقى قبل ما تتجوز- و كل الصحاب اللي اتفرقوا في كل مكان٠
آخر لحسة في الآيس كريم كانت بتبقى اوسخ حاجة لانه بيخلص٠
آخر نقطة في عصير القصب في يوم حر كانت بتبقى اسوأ حاجة٠
آخر نظرة من امك و انتا مسافر على المطار دي بتبقى شعور زبالة٠
آخر مرة كنت قاعد على القهوة و انتا عارف ان تاني يوم مش هتكون في البلد كلها دي اوسخ حاجة٠
آخر مرة تاكل عند مؤمن عشان ولاد كلب حرامية دي حاجة وحشة عشان هتاكل عند مين طيب؟
يالا كل واحد يحكي عن آخر حاجة مؤلمة حصلتله هاهاهاها٠

Monday, May 04, 2009

حتى آخر نفس

سيظل يحكمكم و متبت على قلبكم حتى آخر نفس

هي سيجارة يا ابن الجزمة هتفضل تشد فيها لآخر نفس
و
عجبي٠٠٠٠٠٠٠؟

رجل دين و رجل اعمال و هلم جرا٠٠٠

س: الفرق بين رجل الدين و رجل الاعمال؟
ج: حقيقة لا فرق يا اخوان و الحمد لله الذي انعم علينا برجال الدين المليونيرات٠
س: هل يدعو الدين الاسلامي الى الزهد في الدنيا؟
ج: لا اطلاقا و لكن يدعو الى التوسط بين كل الاشياء ما استطعت٠
س: ما هي شروط رجل الدين او ان كان يحق لاحد ان يختص بالدين رغم انه في القرآن إن الدين لله؟
ج: حبيبي في الله لا احد يحتكر الدين و ليس هناك في الاسلام اصلا مشايخ و لا فقهاء للدين الا ان يعلمك احدهم اسس دينك و فقط و بين العبد و ربه هذا موضوع يختص به رب العالمين٠
س: و ان جاءني سؤال ذيني في عقلي ماذا افعل؟
ج: عزيزي انتا راجل كبير و مخك فيه كمبيوتر زغنن ربنا مديهولك تفكر بيه اذا استفت قلبك و الحلال باين و الحرام باين برضه٠
س: و المشايخ الذين يملكون الملايين ما رأيكم فيهم؟
ج: حقيقة منطق مقلوب ان تكون من ادعياء الآخرة ثم تلبس الدنيا في الدين في الطبيخ في الكفتة في كله و تطلع بفلوس و مزز كتتتتتير فهذا لعيني ما لا سمع به اذن و لا خطر على قلب بشر٠
س: فما رايكم في الداعية الروش و الداعية ابو جيتاز و الداعية ابو سكسوكة و الداعية اللي لية معجبات من المزز و الجواري الحسان؟
كلنا ندعو على طريقتنا راحد بالسكسوكة و وواحد بالساكسونيا و واحد بالعذاب و الايام السودة٠
عزيزي ماذا تقول اخيرا
الله يخرب بيوتكوا بوظتوا البلد
شاكرين و مهللين٠

Sunday, May 03, 2009

الفقر كسبب للنتانة

هل الفقر ممكن يكون سبب لعدم النظافة؟
طيارة مصر للطيران المتجهة من لندن الي القاهرة في احدى الرحلات لو الطيارة دي داخلة في حرب ما كانتش تبقى كدة؟
اية دة مقلب زبالة و لا اية نوعية المسافرين و لا حتى المضيفين؟
برضة كانوا عاملين تحقيق صحفي على عيد المسلمين في المانيا في احدي الصحف لو شفتوا الزبالة اللي سايبينها وراهم و شكل الجنينة بعد ما مشيوا؟
يا نهار ابيض على الجرب و القرف بقى دول مسلمين دول و لا دا شكل حضاري حتى؟
و لا اخر مرة في مصر اية كمية الامهات ولاد ستين كلب دول اللي بتسيب عيالها يبرطعوا و يصوتوا و يقرفوا الناس حاجة زبالة؟
و كمان بتسيب الزبالة اللي الواد بيرميها وراها تقولهم لية كدة تقولك اية يا عم عيال و بتلعب؟؟؟
و لا البامبرز اللي بيسيبوا وراهم في كل داهية تروحها٠
يعني الاجانب دول بيحافظوا ازاي علي نظافة بلدهم ازاي؟
اشمعنى احنا تلاقي شحط قد البغل بيرمي ازازة عصير من بلكونة العربية زي البأف و يبصلك و يضحك؟
اشمعنا احنا هتفضل شوارعنا من غير صناديق زبالة نضيفة و موجودة عشان الناس تتعلم النضافة؟
الفقر مش مبرر للجزب و عدم النظام و النظافة و الادب مع الطبيعة بتاعة ربنا و عدم توسيخها؟
و لية الناس ما عادتش بتستحمى ٠٠٠٠٠ افهم بقى دي؟
هو يعني فقر و قرف و خلاص؟
استحموا يرحمكم الله و كل واحد ينضف نفسه كدة قبل ما نقابل وجه كريم ٠
نفسي افهم لية عدم النظافة يا جدعان اية السبب؟
و بالنسبة لمصر للطيران يا يحترموا نفسهم يا تلغوهم ولاد ستين كلب دول٠
شكرا
مغلول افندي

Saturday, May 02, 2009

الحب و العلاقات

هو لية صحيح كنت كل اما احب واحدة و خاصة و احنا ايام ثانوي كنت اقول للعيال انتا مثلا ما بتتخيلش نفسك معاها في السيكوسيكو -شوفتو انا مؤدب ازاي- يقولي عمري ما تخيلتها في وضع قلة ادب٠
الا انا كنت دايما باتخيل قلة الادب الاول مع اني كنت باحبهم بس كنت شايفها مسألة طبيغية زي الحياة و الموت و الاكل يعني؟
سؤال بس عادي؟
المهم انا في الآخر اكتشفت ان كل اللي قالولي عمري ما تخيلتها في موقف قلة ادب عملوا كل حاجة من قلة الادب مع اللي بيحبوهم دول٠
و انا اللي كنت باعترف بتفكيري في قلة الادب فضلت حمار و عمري ما اذيت واحدة في هذا الموضوع الحمد لله٠

المزة الطائشة

الواحد بيقابل كتير و قليل
لكن ما فيش زي المزز بتوع زمان
يا سلام على ايام الثانوي كدة ايام ما البت انجي كانت تنزل الشارع تبهدل الدنيا و الواحد كان يبقى واقف مع اصحابه في الشارع و المزة من دول معدية و خاصة البت انجي دي كانت حلوة جدا بنت اللذينة دي٠
بس انا كنت للاسف مؤدب و كنت باخاف لغاية ثانوي اكلم اي مزة عشان عيب٠
كنت حمار
بس معلش
الواحد عشان كان شوية شاطر و خاصة في اللغات كانت المزز بتبقى عاوزة تتكلم معايا يعني؟
عادي مش حب و كلام من دة بس تعارف يعني٠
بس انا كنت عبيط و باخاف و امي كانت عاملاي رعب انه حرام و ربنا هينتقم منك و هتروح في داهية و مش بعيد تروح ورا الشمس لو غلطت يمين و لا شمال٠
و كل ما مزة تتصل معاكسة حتى تقولها ابني مش بتاع الكلام دة٠
حاكم اصل كنت الكبير و احنا عيلة محافظة يعني٠
ياه كانت ايام٠
بس انا كانت ليا تهيؤاتي لما كنت اروح البيت اقعد اتخيل دا بعد المذاكرة طبعا ان انا بحب البت مثلا شيرين و حياتنا عاملة ازاي و كلام عيب يعني كتير بقى ٠٠٠ مراهقة بقى و حركات٠
بس للاسف و لا مزة من اللي انا حبتهم في خيالي قلتلها انها كانت شريكتي مثلا في حياتي امبارح؟
و لا حتى قلت لاصدقائي الانتيخ٠
بس ساعات كنت انطس في نظري و انقي حاجات وحشة قوي و اخليها مركز احلامي ما اعرفش يمكن حاجة فيها تعجبني و خلاص٠
مزة واحدة في ايام الكلية حبتني و كانت حلوة شكلا بس كانت بنت كلب ما عندهاش شخصية اتجوزت اول عريس جه لها٠
بس كل اما تقابلني تقولي باحبك و انتا روحي و انتا قلبي و اول ما جه العريس قالتلي باحبك بس هاتجوزه
كان عندها ازدواج في الشخصية باين٠
بس اتصلت بيا تاني يوم ما اتجوزت و انا عجبتني قوي في حركة لما قلتلها انتي انسانة متجوزة عيب ما تتصليش هنا تاني ابدا٠
و قفلت و الحمدلله و ادينا اهو بنخبط في الحياة و هي عمالة تدينا على قفانا٠

التمثيل الاعظم

الناس عندنا و في الخليج بيمثلوا على بعض تمثيل عظيم٠
زي ما علاء الاسواني بيقول ان الدنيا عندنا كأن في مدارس و كأن في تعليم و كأن في حياة و وزراء و حكومة و كله بيمثل على كله٠
بس في ناس مواهب بجد٠
واحد من الاشخاص كان كندي مصري و بيشتغل في جامعة في الخليج كاستاذ للهندسة٠
تشوفه و تشوف كلامه تقول استاذ و رئيس قسم و دكتور عظيم٠
لكن اللي ما حدش يعرفه ان الشهادة مضروبة و انه هربان من كندا و عليه ديون لطوب الارض٠
و الراجل اهو بيعلم حمير هو حد فاهم حاجة٠
و مربيلك دقن دلوقتي و كل كلمة يقولك قال الله و قال الرسول٠
و آدي يا عم قصص و حكايات من كدة كتير سوريين و لبنانيين و فلسطينية بالهبل و كله شغال و كله بيقبض٠
زمن٠٠٠٠٠٠

Friday, May 01, 2009

عقاب من الله

يقول ائمة المساجد ان الوباء عقوبة من الله للناس
فما هو نصيب الغلابة اشمعنى الغلابة دايما شايلين المصايب على قفاهم٠
الا ما في امام جامع واحد اتشملل و قال ان الديمقراطية و بعدنا عنها هو السبب
و لا ان واحد حمار بيحكم بيتسبب في مصايب
و لا ان قرار دبح الخنازير اللي كانت بتنهي المخلفات العضوية و كانت نظام بيئي متكامل٠
وكمان ان الزبالين دول راحوا في داهية كدة و هيشتغلوا كالعبيد عند شركات النظافة الاجنبية٠
اشمعني الفقرا هما اللي متهمين و ما فيش حد اتكلم على الاكابر و الظلمة اللي فوق٠
و بلاش حكاية الابتعاد عن نهج ربنا لان الغرب ماشيين على راحتهم و ربنا كارمهم الدين لله يا جدعان و القانون يجب ان يكون مطبقا على الجميع٠
الدين في قلبك و القانون لابد ان يكون ظاهرك٠
من غير كدة ابقى قابلني٠

Thursday, April 30, 2009

حكومة ذكية فعلا

قالك انفلونزا اسمها انفلونزا الخنازير لانها تحورت داخل جسم الحيوانات لكنها الآن تنتقل بين البشر٠
نحن كصيادلة نقرر انه اعدام الخنازير لن يؤثر في عدد اصابات الناس بالانفلونزا السماة بانفلونزا الخنازير٠
ما هي اهمية قرار يظهرنا كاغبياء لا نفهم حتى ابسط قواعد الطب٠؟
يا جدعان دا فيروس بيتنقل من البشر دلوقتي٠٠٠٠ ارحموا نفسكوا و شوفوا اجراءات صحيحة تعملوها٠

Wednesday, April 29, 2009

الامن القومي

السنة اللي فاتت مجدي الجلاد كتب خبر او تحقيق عن شابين قابلوه٠
و سأل سؤال لكل شباب مصر:
قال لو مصر حاربت اي حرب يا ترى انت كمصري و شاب صغير هتحارب؟
و انا باسألكم اهو يا ترى هتحارب بس جاوبني بصراحة؟
يا ترى هتدافع عن مبارك و سوزان و ابنه جمال؟
و لا هتدافع عن مارينا و اهل مارينا؟
و لا هتدافع عن رؤوساء تحرير الصحف القومية؟
هتدافع عن فتحي سرور و صفوت الشريف؟
هتدافع عن اللي سرقوا الارض و سقعوها و كسبوا المليارات؟
ياتري خدت حقك في حياة و لا وظيفة و لا صحة و لا تعليم؟
طب شربت من نيلها
تعال معايا بقى نغنيلها٠٠٠٠
السؤال مرة تانية
هتحارب و تدافع عن اموال الحرامية و ترجع تنضرب بالجزمة و لا هتعمل اية؟
و يا حلاوة ام اسماعين في وسط عيالها

Monday, April 27, 2009

هل هي فعلا مباراة عادلة؟

باحب انا كل يوم اتفرج على البوم الصور بتاع )اليوم الساقع(
بصراحة بيبين بالضبط حقيقة البلد٠
افراح ولاد المسئولين و الكبار بتوع البلد٠
يا جدعان الفرح بيتكلف اكتر من نص مليون
ازاي واحد يصرف نص مليون في فرح؟
طب بلاش دي مش بيقولك محمود سعد بيحب الغلابة و كويس٠
اهو كان في اليوم الساقع عامل فرح لبنته اقل حاجة تلاتة مليون مستريح؟
طب و ولاد المسئولين دول يعني بصراحة شكل الحمير بس معاهم فلوس٠
طب يعني ينفع كدة يا جدعان انا و غيري يطلع ميتين ابونا و نتنفخ عشان القرش و ييجي واحد يصرف نص مليون كدة عشان ابوه مسئول في الدولة؟
طب هما تعبوا في الفلوس دي؟
يارب مش اعتراض على قدرك بس كدة بصراحة كتير
الناس ولاد الوسخة دول كرهونا في عيشتنا٠
باكلم واحد صاحبي بيقولي على واد صغير كان في شارعنا ابوه مستشار و الواد ده قمة الغباء ابوه عينه وكيل نيابة٠
و هيعمله فرح بملايين باين٠
طيب فين بقى انتقام ربنا من اللي بيعملوا الحاجات الوحشة و بيستغلوا نفوذهم؟
انا مش شايف غضب ربنا و انتقامه غير من ابونا احنا٠
كل خرابة يطلعلنا فيها عفريت٠
و كل حتة يطلعلنا فيها مصايب٠
انا خايف في يوم الواحد يتحول لشبشب من قلة الواسطة و المناصب٠
و النبي يا جدعان لو حد عنده حكاية عن حد ظالم و ربنا انتقم منه يبقى يقولها٠
لان انا بصراحة شايف اللي بيسرق سعيد و مساء الفرحة و الانبساط، و اللي بيعمل الغلط آخر حلاوة٠
و احنا عملنا الصح و ذاكرنا و طلع عينين اللي جابونا و دخلنا كليات كمة و اتعلمنا و سهرنا الليالي٠
و في الآخر لبسنا خازوق مغري تغرية بنت كلب٠
يارب رحمتك
٠

Sunday, April 26, 2009

سؤال فقهي

بصراحة انا مش عارف اقولها ازاي بس هو في فرق بين طبيب من مصر و طبيب مثلا صيني؟
ولا المفروض تبقى اخلاقيات الطب واحدة للناس و العالم كله٠
اصل في ناس بتكتب فقه الطبيب المسلم و فقه الصيدلي المسلم؟
يعني اية؟
و ايه الفرق بين طبيب مسلم و طبيب مش مسلم؟
و هل البشر مثلا مش زي بعض؟
هل في مثلا جسد بخلايا مسلمة مختلف عن جسد واحد بخلايا فاسقة؟
ممكن مثلا يكوت في دواء ملحد او دوا بالليل بعد ما تقفل الصيدلية بيروح يشرب خمرة و يصيع؟
مش فاهم انا شايف على العكس صيادلة و اطباء الغرب عندهم قيم و اخلاق في العمل اكتر مننا بكتير٠
فاذا خصصنا نفسنا كصيادلة مسلمين و مهندسين مسلمين و مش عارف اية مسلمين٠
هتبقى مسخرة بنت كلب و هيكتبونا في الكتب كمثال للحمير٠
هاقولكوا على مثال زغنن:
طبعا كلكوا عارفين دبي و نشاطها في تصنيع الدواء الغير مرخص و هي بتحاول تعمل زي الصين في تصنيع دوا لاي مصنع غير مرخص و عمليات التهريب٠
آخر فضيحة اخوانا في دبي عملوها في انتاج الدواء
انهم كانوا عاملين فياجرا و لما جينا نكشف اية الدوا اللي جواها تخيلوا يطلع اية؟
دوا للملاريا بيسبب اعراض جانبية بنت كلب٠
دا طبعا هو قمة التصنيع و تكنولوجيا الدوا اللي في الامارات٠
فضيحة تانية للامارات برضه
مصنع بيعمل دوا حموضة اكتشفوا انه بيتعبى بالكوز و شفاشق جربانة و دوا الحموضة دا فيه بكتريا هليكوباكتر اصلا اللي بتسبب حموضة مزمنة و مرضية و بتخف بصعوبة بنت قحبة دا غير انواع بكتريا تانية في نفس الدوا٠
ما اقدرش اقول غير انه لا يوجد هندسة مسلمة و هندسة كافرة و لا طب مسلم و طب فاسق٠
يا ريت بس نطبق المفاهيم الاساسية و خلاص
ارحمنا يارب٠

Friday, April 24, 2009

نظرة

الغرب بيبص لينا على اننا حمير و دي ممكن تكون حقيقة لحد ما٠
الشرق و باقصد بالشرق احنا عشان الباقيين مالهمش دعوة بينا بنبص للغرب على انهم حرامية و محتلين لنا٠
بين النظرتين العلاقات الانسانية مهمة و جميلة لما تكون صافية و فيها تقدير للشخص مش لاصله و لا ثقافته و لا لونه٠
في صداقات كويسة و ناس كويسة موجودة في الغرب٠
في الشرق الناس عينيها متغمية بخطابات الغرب الكافر و الكلام المعفن بتاع شيوخ الفتنة بتوع الايام دي٠
عشان كدة قليل جدا لما تلاقي واحد شرقي بيصاحب واحد غربي من غير ما بيفكر انه كافر و ابن وسخة و ابن زنى لان امه و ابوه كفرة٠
مش عارف طب هو كل العالم كفرة و ولاد زنى و كلاب ماعدا احنا؟
و كل الناس دي ما يعرفوش حاجة عن ربنا الا احنا؟
و كل الناس دي لا يساووا حياة بني آدم مننا؟
و كل الناس دي اللي هما خمس اسداس العالم ولاد ستين كلب الا احنا؟
طب لية ما نشوفش الناس بمنظار تاني؟
مش عارف باحس لية دايما ان احنا عنصريين

Thursday, April 23, 2009

الكاتب جلال عامر بالمصري اليوم

Uploaded by www.cellspin.net

كركرة مستمرة

حوار مع صديقي الجزمجي

لابس البلوفر الزيتي بتاع الجيش و قاعد 
على المكنة الكبيرة الخضرة بتاعة خياطة
الجلد في محلهم اللي ما يجيش تلاتة متر
في اتنين متر٠
دايما قاعد صديقنا حسان الجزمجي و دا من
عمري على فكرة بس هو اختصرها بدبلون
صنايع و قعد في محل ابوه بتاع تصليح
الجزم٠
مهنتهم قربت تختفي بس هو عنده تلات عيال
و لازم يشتغل و حسان عنده ذوق في الجزم و
مش اي جزمة تعجبه٠
كان دايما يتريق على - الجزم - اللي كنت
باحبهم ايام الجامعة و ايام ثانوي٠ رغم
اني باعتبر نفسي ذوقي عالي في الحاجات
دي٠
المهم دا كلامه و دا حواره
'يوه انتا فاكر يا محمد ان انا كنت عارف
ان الدنيا هتديني طيزها كده
انا كنت من عشر سنين اقل حاجة باعملها في
اليوم تمانين جنية و حياة النعمة دي
اياكش قلبي يتحرق و يولع زي السوجارة دي
اذا كنت باكدب٠
يوم ما اتجوزت مراتي دي كانت بتمشي في
الشارع كانت توقفه على رجل و كانت بنت
اصول مش بتاعة لوع و اخوك هو الوحيد اللي
ثبتها و ياما اتفسحنا على الكورنيش٠
يالا كانت ايام بنت اية في اللذيذ انا لو
عارف ما كنتش بصيت لجنس الحريم دة خالص٠
دلوقتي في الرايحة و الجاية بنت الوسخة
مكفراني٠
العيال عاوزين لبس العيال عاوزين يروحوا
المدرسة
كل يوم مساريف مساريف
اجيب منين يا عم و الله ما عارف
و الشغل ابن الوسخة مكفرني ما عدش في
زباين تقالي
و لا حتى حد عاوز يعمل جزم تفصيل زي زمان
مع اني باعمل جزم بنت حرام٠
انا اه باشرب الكيف عشان مش عارف استحمل
و بالهي نفسي فيه و هو قرش الحشيش بكام دا
بقى ارخص من البيبس٠
ناوي اعمل ايه؟
العمل عمل ربنا يا ياخدني يا ياخد العيال
و امهم٠
بتقولي اي خدمة:
هات عشرين جنيه يا محمد بيه ربنا يكرمك
نجيب بيها شوية بكر خيط للمكنة دي
انتهى

اتباع السادات

لكي تعرف البشر لابد ان تراهم في لحظات الغضب٠
هذا ما يعتمد عليه محللي الشخصيات الاذكياء
كثير من مدونينا يتشدقون بالديمقراطية و الحرية حتى اذا اصابه الشرر من دعاة الحرية انطلق كحمار هائج ليشتم هذا و يلعن ذلك٠
ثم ان كثير من اصحاب الرأي في مصر كما قلنا سابقا انه لولا جدب الارض اصلا لما ظهروا و ما كانوا٠
كثير منهم يتبعون آراء للوهلة الاولى تذهل ثم تصيبك الحيرة من هذه الطفولة السياسية الموجودة لديهم٠
لكنك تؤمن حينها انه مهما كان الانسان مشهورا و متعلما فلابد له من حصافة سياسية و عقل رزين و خاصة سياسيا حتى يدرك السئ من الجيد٠
انني اعيب على كل من يتبع آراء السادات رئيس مصر السابق لانه مهما كان منه فآرائه في كثير من الاحيان اصابت مصر بالتراجع٠
ثم انه كيف يتبع من دمر اصول مصر كثيرا و لولا كثير من التنازلات لما صرنا الى ما نحن فيه٠
عليك ان تعلم ان حسني يسير على درب السادات كموظف و لكن ينقصه الاداء المسرحي و كذلك الكاريزما٠
لا ارى خيرا في ايام السادات لمصر و هذا هو ما اراه٠
عبد الناصر مهما كان فعل ما هو خير و ابقى و كان حتى و لو ظاهريا يهتم بالغلابة٠
ليس لي آباء اقطاعيين حتى احزن و لكن اهلنا هم ملح الارض الذي تعلم و ظهر بوجود هذه الثورة حتى و ان انقلب حالها٠
كنا فلاحين و كان الباشا يقتل الفلاح و لا يدفع حتى تمن ديته٠
و على ايام ناصر اصبحنا مهندسين و اطباء٠
عموما للحديث سياسيا بقية الا ان متبعي السادات اقول لهم
انتم على خطأ

جهاز العروسين؟

هو اية المفروض العريس يجيبه في الزمن دة؟
و العروسة يا ترى بيندفع لها مهر و لا هي اللي بتدفع الايام دي؟
ممكن واحد يبقى جايب بابور و لحاف و سرير نحاس يتجوز و لا الطلبات ممكن تكون اكتر؟
الحقيقة غير مفهوم طمع الناس الايام دي؟
ممكن برضه تعملوها حملة على الفيس بوك
عودة الى الطبلية
ممكن نسميها كدة
انا بقى لما اجي اتجوز هاكرمها اخر كرم و هاجيبلها فوق الباجور
لندة جاز نمرة عشرة و كمان فوق البيعة هاجيبلها حصيرة من بتاع المحلة٠
اي خدمة يا ردالة٠
ما تنسوش حملة
العودة الي القصرية٠
لا مش القصرية قصدي الطبلية٠

حملة ما تعبرهمش

دا عنوان حملة المفروض نعملها على الفييز بوووك
المفروض اننا ما نعبرهمش لانهم مش حاسين بينا
بس المشكلة ان الحكومة هتفرح بحملة زي كدة٠
ممكن بس حملة ما تعبرهمش معناها اننا ما نعبرهمش في اي حاجة٠
ما تسمعش كلامهم و لا تفتح تليفيزيونهم
ما تكلمهمش لو قابلتهم
حملة ما تعبرهمش دي حملة هابلة

Wednesday, April 22, 2009

نظرة مهنية



من ناحية الصيدلة في بلدنا
و دا موضوع انا عارف انه ممكن يكون غريب شوية
بس كنت عاوز اتكلم فيه معلش٠
الصيدلة في مصر متأخرة جدا جدا
على الناحية العملية بطريقة تدعو للانفجار٠
اول هام :
يعني في بلاد ماو ماو
دلوقتي بقوا بيكتبوا روشتاتهم على الكومبيوتر
و بتبقى واضحة لان اي غلطة في الدوا دلوقتي
بتودي العيان ورا الشمس٠ دي طبعا تابعة
لنقابة الطباخين
اللي هما الاطباء
يعني فنرجوا ان هما يعتبروها اساسية في الشغل٠
تاني هام :
لما تيجي تبص على الخريجين و العدد طب دول هيروحوا فين يا جدعان؟
لا احد يعلم و لا احد يعرف؟
تالت هام :
الكومبيوتر في الصيدلية
و دا مش معناه انك جايب جهاز بيطلعلك السعر و الجرد للادوية و الكلام الفارغ دة بس


٠
المهم انه يكون متوصل بشبكة فيها بيانات المريض و روشتاته
و كيفية استعمال الدوا
و التداخلات الدوائية
و انك كصيدلي تقدر تجيب معلومات لو احتجتلها من على نظام موحد
لمصر كلها٠
رابع هام :
هيصة المخازن و الدوا و كل ما واحد يتزنق يطلعلك دوا ٠
دا في ادوية عشان وجع الحواجب و زغزغة ال .........لا مؤاخذة يعني٠
فين ام الدولة٠
تنظم الهيصة دي٠
مافيش طبعا٠
خامسا :
طبعا النقابة
النقابة اللي دورها
الرحلات ....و اتوبيسات العمرة....... و نصرة فلسطين٠
فياريت نشوف اخوانا من مصر الشقيقة
اللي يعني انتوا اصلا المفروض تخدموهم٠
النقابة عندنا الحقيقة بتقوم بدور هام جدا
و هو البضينة على الناس
و قاموا بحركة قفل الصيدليات اللي صدفة عملت صدى جامد في البلد
فدلوقتي مفكرين نفسهم ياما هنا و ياما هناك٠
سادسا
شكل الصيدلية و مكانها يا جدعان
مين ابن وسخة بيسمح بالموجودين دول كلهم؟
دا بقت اكتر من علب السمنة
الصيدليات في كل داهية دلوقتي٠
سابعا
ما فيش حل و الله انا شايف كدة انا لله و انا اليه راجعون
البقاء لله يا جماعة
ما نجيلكوش في دوا تاني

كلام في الطبيعي

Uploaded by www.cellspin.net

Tuesday, April 21, 2009

البحث عن تأشيرة

لا يعرف عذاب البحث عن تأشيرة الا من كابده٠

الا انه مثلا من حق الدول الا تعطي لرعايا دولة اخري تاشيرات٠
لكن في كل دول العالم موظفي السفارات من مواطني دول الدولة المضيفة للسفارة
بيتعاونوا مع اخوانهم للحصول على سفرية الى دولة السفارة٠
إلا موظفين السفارات المصريين
و هؤلاء هم من رأيت و في الحقيقة انهم ولاد ستين كلب٠
يتعاملون مع اخيهم الاتي الى السفارة كانه كلب اجرب ٠
رايت احدهم حينما حاول الحصول على تاشيرة لدولة اوروبية
الحقيقة اخوانه الموظفين المصريين في سفارة تلك الدولة
شمموه طيز العفريت
و ما خدش التاشيرة٠
و لكنه وفق لدولة اوروبية اخرى
و ما ان حصل على جنسيتها
حتى سارع الى القاهرة لينتقم من اخوانه في السفارة
و تسبب في رفت اثنان و ووقف للثالث و الحمد لله٠
السؤال هنا هو:
الموظفين بتوع السفارات المصريين اية مشكلتهم ?
و لية موظفي الدول الاخري زي تركيا مثلا
فاتحينها على البحري لاخوانهم
يروحوا اوروبا لما استعمروها خلاص٠
سؤال آخر:
هو انت لما اشتغلت في سفارة اوروبية بقيت اوروبي خلاص ما تاخدوا عبرة من
دول٠
بس خلاص

Monday, April 20, 2009

يوم عادي

الصراحة يا جماعة صدمتوني في التدوينات بالصوت٠
انا كنت مفكر عامل سبق صحفي و حركات٠
اصلي انا باكتب بالعامية المصرية و دي التعابير اللغوية بتبان اكتر في الصوت٠
هانشر التعليقات لما ارجع و هاناقشكوا فيها٠
و هاروح الغي عقد النت بتاع التليفون٠
اشوفكوا النهاردة ان شاء الله
عاوزين نبقى نتكلم
انا باحب سكاي بي اية رأيكم نتكلم هناك انا الاكونت بتاعي اسمه
saidaly0
و دة على سكاي بي لو نتكلم
و معلش يا رامي باشا على الفيس بوك انا مش مندمج فيه مش عارف ليه
ياريت نبقى نتقابل على سكاي
سلامي للجميع٠

لية تدوين صوتي؟

Uploaded by www.cellspin.net

اول تدوينة بالصوت بحق و حقيقي

مش عارف تجربة و خلاص

Uploaded by www.cellspin.net