Monday, July 20, 2009

ليلي و نهاري

ليلي و نهاري على ناري بابات حيران
الواد تامر دا أغانيه معقولة و لو إنه بضان كسخص يعني
المهم
كنت باتكلم مع مزة من ضمن المزز الطايشة في البلد دي
فبتقولي انتا باحس إنك لو نزلت في وسط الغابة عادي هتتصرف و تعيش بس لو حد مننا راح في أي حتة هيضيع
أنا في نفسيتي قلت ما هي دي حسنة عصر مبارك إننا بقينا نتكيف مع أي مصيبة و نمشي زي الجزم.
أنا قلتلها دا أنا وحش صغنن و هناك في مصر في وحوش بجد عايشين بفشل كلوي على فشل كبدي على فشل دموي و كل انواع الفشل اللي تخطر على بالك.
البت ما كانتش مصدقة قلتلها بكرة تشوفي يا بنتي دا إحنا بعد كدة هيجيبونا في قناة ناشيونال جيوجرافيك
او ديسكفري.
بصي يا مزتي العزيزة (البت عليها جوز عيون يخلوا العفريت يتوب)
بصي إحنا أهم حاجة فينا إننا معتزين لسة بكرامتنا
و لسة في ناس عندها أمل و دي حاجة صعبة الى ابعد الحدود
بس هو ابن الوسخة يغور و احنا نبقى زي الفل
ربنا يسهل

8 comments:

Anonymous said...

و الله انت عسل
عليك شوية تشبيهات تحفة

mohamed hassan said...

يا باشا الله يخليك
دا كله من ذوقك بس
تحياتي

فارس عبدالفتاح said...

على فكرة يا محمد انت نسيت الفشل الدماغي بس هو موجود في الطبقة الراسمالية في البلد وده اللى مزود الطينة بله على دماغ ابونا

يعني اللى معاه فلوس مش عايز يشغل فلوسه ويحن على الغلابة

mohamed hassan said...

فارس باشا
ضيف انت كل انواع الفشل الممكنة
العملية باظت منهم و ربنا يسترها علينا
تحياتي

Anonymous said...

يا فارس ما هو ال معاه فلوس خايف يشغلها في وسط عدم الإستقرار الإقتصادي الي البلد فيه

و من بكره الحكومة تقدر تلبس اي واحد تهمه بسيطه و تصادر امواله
اقربهم خيرت الشاطر و باقي الاخوان

و قيس علي كدا ابو الفتوح
و أباظة

و كم الرشاوي الي لازم الواحد يدفعه علشان يقدر ياخد ترخيص لاي شئ

برضة المناخ مش مساعد و دا عامل من العوامل

في عامل تاني
وهو ان لما واحد بيعمل مشروع و لا حاجه و ربنا يوفقه فيه تاني يوم البلد كلها تقلده
زي فكرة السنترالات كدا البلد بحالها بقت سنترالات

كذلك الصيدلة
الناس مفكره الصيادلة بيلهطوا من براميل الفلوس فكله عاوز يدخل صيدلة

mohamed hassan said...

عماد باشا
هيكل قالها آخر حلقة من برنامجه
ان ما فيش شعب بياخد حقه ببلاش و لازم يضحي عشان ياخد
حقه ويثور ضد الحرامي الكبير و اللي معاه
و انا الحمدلله بافضح ابوهم في اي حتة و هنا كل بتوع الحكومة
متعقدين من اللي خلفوني عشان باديهم بالجزمة
بس احنا مش لازم نسكت و حقنا ما نسيبوش للحرامية
تحياتي

فارس عبدالفتاح said...

انت متابع جامد اوي يا محمد مكنتش متوقع انك متواصل الى هذه الدرجة مع برنامج هيكل

mohamed hassan said...

فارس باشا
الكلام الحقيقي لازم نتابعه
و الناس الكويسة لازم نسمعها
و التاريخ المشرف لازم يتقري
دول ناس لما كانت بتتكلم الدنيا كانت بتسمعهم
مش دلوقتي اللي ما في حد معبرهم
تحياتي يا ريس