Friday, December 18, 2009

فصل : في مسألة الأصالة و الرخامة

المكان : مدرسة قاسم أمين الابتدائية
الزمان : أوائل الثمانينات
كل يوم من بدايات دراستي في المدرسة كنت أدعي التوهان و أني لا أعرف الطريق إلي المدرسة إلى أن مر شهران و تعذبت أمي بتوصيلي كل يوم صباحاً
فلما وجدت أحد جيراننا لديها طفل في مثل عمري سألتها ممكن يبقوا أصحاب؟
فردت الولية الرخمة قالتلها: وماله يا حبيبتي و ماله؟
و هكذا حصلت على أول صديق طفل ظريف الشكل و أسمه أحمد يأكل كثيراً و نظيف و يحب معاكسة الفتيات.
أنا كنت أكره المدرسة و اللي عملوها فمن أطفال ببرابير و بيشخّوا على روحهم ، إلى مدرسين مرعبي الهيئة و الأخلاق.
مازلت أكره رائحة موظفين و مدرسين و أساتذة الجامعات لدينا لا أعلم لماذا و لكني أؤمن أنه ليس عن طريق هؤلاء البؤساء سنصل لأي شئ.
نرجع لصديقي هذا من أول يوم تعّرفنا فيه عرفت أننا أصدقاء كنت أشاركه الكلام حول النساء اللي هما بنات في أولى إبتدائي.
شاركته حب فتاة لبنانية جاءت شهر لتدرس معنا ثم رحلت فجأة تاركة قلوب مكسورة كثيرة ورائها.
كانت نكاتنا أصلية و كذلك معظم أصدقائي بعد ذلك كان كلامنا لا يوجد لدى شلل أخرى لأن هزارنا أصلياً
حينما دخلت الجامعة تعرفت على عيال أبضن من البيض.
كانت نكاتهم تقرف و حتى الحديث العادي ممكن يوقعلك البيضتين و تقعد ساعة تلم فيهم تاني.
لم أكن أتصادق كثيراً مع تلك النوعية لأن الواحد مش فاضي و كمان وقاية من الأمراض.
مش عارف لية حاسس إن النوعية التانية دي بقت في كل حتة.
تفتح التليفزيون تلاقي البيض بيتدلدق
تشوف حتى الممثلين تلاقي أومليتات مالهاش حل.
دا حتى الدين بقى في دعاة و شيوخ بنفس الطريقة.
حتى السياسة تلاقي برضة بيض من السوبر ابو صفارين.
بس هو اللي محيرني راحت فين الناس الأصلية؟
فين الناس الحقيقية ؟

7 comments:

rami said...

معلش يامحمد باشا خليني انا كمان أبضن عليك ..يعني اشمعنا انا
:D
--------
مازلت أكره رائحة موظفين و مدرسين و أساتذة الجامعات لدينا لا أعلم لماذا و لكني أؤمن أنه ليس عن طريق هؤلاء البؤساء سنصل لأي شئ.
--------
معلش يعني الجمله دي بضان يعني انت تشمهم ليه ولا مؤاخذه وطبيعي ريحتهم مش هتكون ظريفه ..ياخساره البتات اللي اتحملتها المدونه في الجمله دي

عارف السي بلاس بلاس
C++
بتاعه البرمجه ..اكتر حاجه بتبضن منها صراحه البرمجه دي بعيد عنك دي بقي البضان بلس بلس
B++
http://www.youtube.com/watch?v=TRra5W5oYJk

mohamed hassan said...

ماشي يا رامي باشا
بس البتا دي كانت صغيرة هنا مش محسوبة على المدونة
بس و الله المصالح الحكومية و الموظفين ليهم رائحة و لون
وشكل كئيب عندنا كأنهم مطبوعين على الرخامة
بالذات أساتذة الجامعة
و بعدين السي بلاس بلاس
يا ريس إنتا محظوظ إنك ليك فرصة تتعلمها ياليت كلنا ننالها
لو حبيت البرمجة هتبدع فيها
بس أنا متوقع لك مستقبل فيها
تحياتي

rami said...

وبالذات أساتذه الجامعه
------------
انا عن نفسي مابحاولش احتك بالناس دي الا في امتحان الشفوي...اللي يتكلم كده عن الدكاتره يبقي اما احتك بيهم او كان من الطلبه "المزيته "اللي بيقعدوا في اول بينج دول ويسألوا الدكتور ويكتبوا كل كلمه بيفرزها في المحاضره وبعد المحاضره يجروا وراه يسألوا برضه وكده انا اصلي عارف نوع البشر ده

بص السي او البرمجه عموما في الاول تحبها وتلاقي الحياه إزي و
Hello World !
وبتاع ..بس ياعم غوط شويه فيها كده ..هتلاقي بييييييييير كبير والفنكشنز واللوبات وبلاوي زرقه
انا عديت من مواد البرمجه كلها بمقبول وراضي اخر حاجه ..بحفظ الكود او اضعف الايمان باكتبه علي الديسك ..من الاخر البرمجه ليها ناسها

بالمناسبه انت ايه علاقتك بالبرمجه يادوك؟

mohamed hassan said...

رامي باشا
أنا كنت باكره الأساتذة من غير أي سبب
غير إنهم متكبرين و كانوا مفكرين نفسهم حاجة
و للأسف أنا ما شفتش منهم أي خير
و همّا سبب كبير لتأخرنا بالصورة الغلط اللي بيحسسوا الناس بيها
إن عندنا تعليم و جامعات و دي أكبر غلطة لأن دي مش حقيقة نهائي
و لازم نبني التعليم من الأول للأسف و دول كلهم يتمحوا بأستيكة
بالنسبة للبرمجة
أنا مستني عليها لما تبقى أسهل شوية في تطبيقاتها
حاولت أصمم كام موقع و نجحت بأدوات و مساعدات
بس برضة اللغات عاوزة وقت بالذات
HTTP
بس أنا عاوز أتعلم الآي فون الأيام دي
لأنه شكله أسهل و برمجته شكلها عبيط
بس نتايجها روعة
ماليش في السي بلاس دي خالص
بس عموماً أنا معقول بالنسبة لصيدلي
بيفهم في الكومبيوتر شوية و خلاص
و شوية شبكات برضة عشان شبكة الصيدلية
و إرتباطها مع السيرفر بتاعها
عموماً اللي أنا كويس فيه هو مجال الصيدلة
و دا هو اللي باكل منه عيش
تحياتي يا ريس

rami said...

انا عندي نفس الكره والضغينه دي للمدرسين بتوع ابتدائي بس مش كلهم ..مره مدرس علوم اسمه ماهر الله يحرقه مطرح مايكون بقي..المهم المدرس ده ماكنش عارف يسيطر علي الفصل والعيال كلها شغاله رغي وكده وفي نفس الوقت انا كنت قاعد في حالي خالص وشبه نايم يعني ..المهم راح قالي قوم اوقف وافتح ايديك وضربني عصيتين ولاد جزمه كسم الافترا يعني...بس ياعم الفصل بقي هادي ووديع وماحدش فتح بقه بعد العصيتين دول والعيال بتسألي مش مصدقه انت اضربت ليه وانا والله لو اعرف اقول علي طول

شوفت بقي مكمن الكره عندي لكن انت مره تقولي ريحتهم ومره من غير سبب ..ده انت فافي بقي
:D

HTTP
علي فكره ده بروتكول ..انت اكيد قصدك حاجه تانيه

عايزك ياباشا تشوف الكورس ده وهو عباره عن محاضرات لو مهتم ببرمجه تطبيقات الاي فون
http://torrents.ru/forum/viewtopic.php?t=1775356
لو عرفت تسجل وتحمله اوكيه ..غير كده هبعتلك ملف التورنت لو تحب

mohamed hassan said...

الف شكر يا ريس على الملفات
دا الموضوع شكله كبير جداً
بس انا هاحاول ابص فيه
انا ما اعرفش بروتوكول http
انا كنت فاكر ان البرامج اللي باستعملها دي مبنية علي
http
و ان الويب ٢ دا حاجة مرتبطة بيهم
بس عموماً أنا بافهم كويس في مجالي و هو الصيدلة
انا مش هاحاول اتكلم تاني عشان ما نتفضحش
عموماً انا مستني اما المجال دا بتاع الكومبيوتر يبقي اسهل
و اقدر بعدها اشوف هاهاهاها
تحياتي و هابقى اكلمك عموماً

ميدو البرنس شاهين اللول said...

ها ها ها ، يا بضاااااااااااني بيض