Sunday, January 31, 2010

أرخص سعر للمكالمات الدولية من واقع خبرتي المتواضعة

مقال تقني بحت
about VOIP
كيف تتصل من أي دولة في العالم بأرخص الأسعار؟
الآن على سبيل المثال التاريخ هو 31.01.2010
و سعر المكالمة الدولية لمصر حوالي خمسة سنتات من اليورو أي حوالي اربعون قرشاً مصرياً من أي مكان في العالم طالما لديك اتصال بالانترنت و بصوت ممتاز الجودة.
و أيضاً يمكنك استعمال جهاز تليفون منزلي عادي للاتصال كما سيلي في الشرح.
كما ان العديد من دول العالم باوروبا و امريكا الخطوط الارضية لديهم يمكنك الاتصال بها ببلاش.
ازاي بقى؟!
بص يا سيدنا الموضوع بمنتهى البساطة كالآتي .
روح الموقع دة


و شوف ارخص شركة بتدي مكالمات لبلدك مثال مصر هتلاقي
بتقدم الدقيقة الارضي او المحمول بخمسة سنت من اليورو.
طب المفروض تعمل اية ؟
تروح رايح على موقعهم و تنزل البرنامج بتاعهم عالكومبيوتر و بعدين تشتري كارت بعشرة يورو اول مرة هتقول ما عنديش فيزا هاقولك ما فيش مشكلة يا معلم. تروح رايح على اي ويسترن يونيون بس يكون ليكI.D لدى الشركة تلك و تشتري بفلوسك العادية بتاعة البلد اللي انتا فيه القيمة اللي انتا تحبها.
واحد عيقولي طب ما لازم كومبيوتر هاقولك لا يا فالح ممكن من الكومبيوتر او من جهاز تليفون ارضي عادي بس لازم يكون عندك الجهاز دة توصله بالنت و بعدين توصل بيه جهاز تلفون ارضي عادي

Product Small Photo

و طريقة تشغيله بقى تقرف شوية فلو حد اشتراه ابقى علق عندي و انا هابقى اتصل بيك اقول لك و خلاص اريح من الكتابة
و الاحسن كمان انك ممكن تحط الخط دة كمان على موبيلك لو الموبيل حديث و فيه اتصال سريع بالنت تروح حاطط عليه مثلاً
برنامج زي دة

و بعدين تروح لل settings بتاعه و تحط حسابك هناك و بكدة يا معلم تتكلم من موبيلك بسعر رخيص موت و انتا في اي حتة.
ما تنساش تبقى تشكرني لو اشتريت من الخدمات دي عشان انا اللي قولتلك يا جزمة.
و ما تنساش تتابع الموقع اللي بيقارن الخدمات
عشان تعرف ارخص الاسعار دايماً

13 comments:

Anonymous said...

جزء الوسترن يونيون دا محتاج توضيح
يعني أروح لوسترن و أحول المبلغ للشركة الي اخترتها دي و لا ايه ؟

mohamed hassan said...

بص يا سيدي
انتا الاول بتسجل في الشركة اللي بتختارها و تعمل لك اسم عليها و بعد كدة بتختار مثلاً طريقة الدفع عن طريق الويسترن يونيون بيديلك استمارة تطبعها و تكتب فيها اسم المستخدم بتاعك و المبلغ اللي عاوز تحوله
و هما عموماً كاتبين التعليمات هناك
بس كدة

mohamed hassan said...

تروح بالاستمارة دي الويسترن يونيون و تدفع الفلوس و يتحولك الرصيد فوري بس يا عم
و لاحظ ان الدول التانية برضة رخيصة بس اختار ارخص مقدم للخدمة للبلد اللي انتا عاوزها

mohamed hassan said...

بس يا عمدة هو مش السعودية المكالمة لاتصالات من عندكوا
رخيصة و لا اية؟

Anonymous said...

مشكور يا صاحبي
الاتصالات هنا رخيصة برضه
لكن انا عاوز أكلم كندا يا كبير و كنت لسه هشتري قطعة اسمها ماجيك جاك تتصل بكندا و امريكا لمدة سنة مجانا

mohamed hassan said...

هو الماجيك جاك دا معتمد على الخدمة اللي باقولك عليها دي
خدمات voip
بس الماجيك جاك لازم يكون متوصل بكومبيوتر
دي انتا حر تختار اللي انتا عاوزة سواء تليفون عادي او كومبيوتر او موبيل
و تختار كمان مقدم الخدمة للبلد اللي انتا عاوزه و ارخص سعر في التاريخ
كمان لو زهقت و ما عنتش بتكلم الدولة دي تقدر تكلم برصيدك
اي حتة في العالم
فدي مميزات كتير يا عمدة تخلي الواحد رايق
يعني انا باكلم مصر دلوقتي اقل مكالمة مثلاً عشرين دقيقة
بادفع فيها واحد يورو يعني
حوالي سبعة جنيه و نصف
و دا شئ ممتاز
و الصوت حاجة آخر مزاج
يعني تمام التمام
و ربنا يوفق يا ريس دايماً

فارس عبدالفتاح said...

جهد مشكور يا بطل على الموضوع ده والموضوع اللى قبله

وعلى فكرة الموضوع اللي قبله نفس برنامج تليفون نوكيا مش فاكر الموديل بتاعه بس هو فيه 28 ده اللي أنا فاكره

هي هي نفس التكنولوجيا

وأما بخصوص الاتصال والله أنا محتاج الموضوع ده بس للأسف لا عندي نت دائم ولا عندي تليفون حديث


لأني باختصار شديد لا استخدم التكنولوجيا إلا إذا كنت مجبر عليها أحب أعيش حياتي ببساطة وسهوله وبحس أن حكاية شراء أي تكنولوجيا حديثة سفه وفي نفس الوقت بساعد الغرب على بيع سلعهم


قد يكون هناك وجهة نظر مخالفة بس هي دي مشاعري من ناحية التكنولوجيا الغربية وتسويقها في الدول العربية


على فكرة أنا مش رجعي أو محافظ بل بالعكس تقدمي جداً وأومن بالتحديث والتطوير


ولكن بحس أني أي تكنولوجيا جديدة بتنزل السوق والناس تطلع تجري عشان تشتري منها حتى ولو مش هتستفيد منها استفادة عملية تعوض لها الفلوس اللي دفعتها في هذا الآلة أو التكنولوجيا الجديدة

المهم انه يمتلك هذه الآلة أو ذلك الجهاز وخلاص يعني يفشر بيه على الناس اسمه ماسك الجهاز الفلاني أو عنده الآلة الفلانية

لهذا أنا اعتقد أن امتلاك الأشياء التي لا احتاجها شيء من السفه

وفي نفس الوقت مساعدة للغرب في تحسين صناعته وتكنولوجياته على قفايا

وهذه وجهة نظري وقد أكون مخطأ

لكن هي بلا شك وبلا جداً تكنولوجية محترمة وتستحق التقدير وهي انجاز حضاري محترم

لا شك في ذلك

mohamed hassan said...

صح يا فارس باشا
بس التكنولوجيا دي إرث حضاري ما ينفعش نقول عليها
منفعة لواحد معين
لأن في الأول و الآخر ما حدش قالنا و الله ما تشتركوش في صناعتها
إحنا اللي متأخرين و أظن الصين خير مثال للناس إذا أرادوا التقدم
و بعدين موضوع مساعدة الغرب دي صعبة لأن الناس اللي بتعمل
الأجهزة دي و التكنولوجيا دي بيعملوها للناس كلها
لاحظ أن العرب كلهم على بعض ما يجوش ٣٠٠ مليون
يعني جزء صغير من السوق العالمي
بس رأيك يحترم لأن فعلاً ساعات من كتر الدوخة بين
التكنولوجيات و الأجهزة الحديثة
الواحد دماغه باظت
فعلاً لازمالواحد ينقل نفسه للطبيعة كل فترة
عشان يشوف قدرة ربنا و يرجع هدوئه النفسي
تحياتي

فارس عبدالفتاح said...

لالالالالا

عفواً

أحب اصححلك حاجة يا محمد أو بلاش اصححلك .. خليني أفكرك بشيء

أنت عارف أن أميركا من عام 1995م، فرضه ضرائب باهظة على السلع الصينية عند دخولها الأسواق الأميركية

أليس هذا نوع من أنواع الحظر أو تحييد سلع معينه

وهم إي أميركا قائدة العالم الحر وهي واضعة سياسية العولمة وهي من تؤمن بالسوق المفتوحة وهي الدولة التي تعترف بالنظام الرأسمالي والمنافسة المفتوحة

فكيف يتثنى لها أن تفعل ذلك ما دامت تؤمن بمفهوم المنافسة والسوق الحر

أخي محمد

نعم كل التكنولوجيا أو الاختراعات هي نتاج حضاري للمجتمع البشري كافة وهذا من خلال نظرة العلم الموضوعي

أما بخصوص السياسية فهذا شيء آخر

وأيضا في الاقتصاد هذه أمور أخرى

فيرجى التفرقة بين هذا التبيان في الألوان والإضاءات

حتى تستطيع أن ترى الصورة واضحة وارى انك ترى الصورة واضحة ولكن هناك التأثير بموضوع تخلفنا

نعم نحن متخلفون عن مواكبة التقدم الحضاري العالمي للمجتمع البشري الغربي بصفة عام ولكن هذا لا يجعلني سوق رائجة لتسويق منتجاته وسياساته الاقتصادية والاجتماعية والسياسية والفكرية أيضا


هذه لا يستقيم مع خصوصيا القومية العقيدة لكل امة

وهذا ما فعلته الصين وما فعلته اليابان وما فعله الروس قبل ذلك

وما يفعلونه ألان


فلا خلاف على التكنولوجيا .. ولكن الخلاف في تسييس هذه التكنولوجيا

فمن المفروض أن أكون مساهم فيها كعربي وكمسلم ولكن أنت تعرف حق المعرفة ما هي أسباب عدم مشاركتي فيها

وعلى الطرف الآخر الذي يملك هذه التكنولوجيا أن يطرحها على أساس أنها نتاج حضاري وليست سلعة مسييسة

وانظر إلى التكنولوجيات الفضائية وانظر إلى التكنولوجيات العسكرية وانظر إلى التكنولوجيات الطبية .. الخ

كيف يسييسها الغرب على الدوام

أو في أحيان كثيرة وأنت تعرف


وأنت اشتكيت من موضوع بوابات التفتيش الالكترونية في موضوعك بعنوان " هتقلع يعني عتقلع " وأظن أن هذا أيضا استخدام تكنولوجي مسييس

Anonymous said...

عم فارس أنا أؤيدك في كلامك
و رأيي إنه طالما الواحد محتاج للتكنولوجيا لازم يستخدمها

و بخصوص تأخرنا
بصراحة
الواحد قلبة بيتعصر من الألم

و الله أعتقد إن كل شاب فينا عنده طاقة عاوز يوظفها في مكان يستفيد منها
بس فين بقي المكان دا

سؤال لمحمد بك
هتاخد كام ع التدوينة دي يا عكروت ؟


------
كان لي طلب تاني عندك يا محمد
امتي بتكون موجود علي سكيب عشان بعد اذنك عاوز ادردش معاك شوية
ولك الشكر

mohamed hassan said...

يا فارس ما هو حتى و هما عاملين للصين حظر لسة الصين مدايناهم
بمليارات قد كدة
بس لاحظ ان الصين لا بتقول مش عارف مين بيضطهدني و لا
مش عارف مين بيخوفني
دول ناس بتشتغل و مالهمش دعوة بحد
و عملك هو اللي بيرد على محاولات الآخرين لتوقيعك
و خلي بالك برضة إن لما هتيجي تطلع لفوق ما حدش هيرحب بيك
لأنك هتاخد مكانه و هتنافسه فلازم يضربك لأن ما حدش هيسيبك تتفوق عليه
فمتتخيلش ان الصين و الهند دول طريقهم مفروش ورد يعني
دي ناس صنعت بايديها معجزتها
و برضة سايبين اللي يحقد يحقد و اللي بيحاول يعمل مشاكل يعمل
اهم حاجة انهم يعملوا اللي عليهم و مجهودهم بالكامل في الحتت الصح

mohamed hassan said...

عماد
التدوينة دي انتقام من فودافون
مش هاخد من وراها حاجة
انا ما بافتحش السكاي بي كتير الايام دي بس هاخليه عالتليفون لو هنتكلم
هتلاقيني يا باشا من بكرة عالسكاي بي

Mahmoud said...

على فكرة الموضوع مش محتاج لويسترن يونيون ولا حاجة...دة في ناس كتير دلوقتي بتقدر تشتري منهم و انت في مكانك و انا باشتري من واحد بنفس الطريقة و بيديني كود و بادخل الموقع احطه في حسابي و بيشتغل فورا