إية يعني

إية يعني لما يكون معاك فلوس و عايش حياتك و إنتا في مجتمع كل البشر فيه مش لاقيين ياكلوا؟!
إية يعني لما تبقى تروح قهاوي و كافيهات غالية و إنتا شايف برة من الإزاز عيون بتلمع في الضلمة و بتبصلك بنظرة الضبع اللي مستني فرصته عشان يجيبك من قفاك و ياكلك و يموّتك.
مشكلة الأغنيا في هذا المجتمع رهيبة لأنهم سرقوا و نهبوا بس مستنيين الإنتقام. لاحظ إن في ناس هايمة في الشوارع كتير دلوقتي و ساعة لما يوقف النظام هيتحولوا لوحوش بتاكل البشر زي أفلام الزومبي اللي بيجيبوها.
كتير بأحس لما باكون في فنادق غالية في مصر بنظرة اللي بيخدموا من ورا ضهر البشر كنظرة واحد هيضرب ضربته في يوم ما.
مش إحتقار للناس دي بل بالعكس هما إتظلموا فعلاً بس هل سيكون يوم الدينونة المصري مرعباً كما أتخيله؟!
و فعلاً إيه يعني لما تسكن في الرحاب و لا دريم و لا القطامية هايتس و إنتا محروس بألف سور و عيالك خايف عليهم من عيون الأغيار الحقوديين.
ناس كتير لديها أمل بس لازم تكون في نار تحرق عشان تطهر لأن في رعب تحت الأعماق و في ظلم منتشر و ليكونن إنتقام الجوعى ضارياً و متوحشاً و فوق كل الحدود.
ربنا يستر.