زمان في اول التسعينات
كانت امي تبعتني ساعات السوق اجيب الخضار و اللحمة
مثلا مرة كدة في الاسبوع٠
كان بيبقى يوم زبالة من اوله بس عادي بقى كنت باروح اجيب اللي ربنا يكرمنا بيه و من غير فصال٠
كان عندي بتاع تلاتشر او يمكن اربعتاشر سنة كدة٠
الجزار طبعا كان راجل شراني و انا كنت باشتري و انا مكتوم و في مرة كان بيتخانق مع راجل و زعيق و دوشة و انا كنت طالب كيلو عجالي و بعدين في وسط الزعيق بيبصلي و يقولي : قلت كيلو ضاني؟ قلتله اللي تجيبه سيادتك و خدت الضاني و مشيت عادي٠
دا غير الدهنة و الشغت اللي في اللحمة و انا ساكت٠
اه موضوع البوست في مرة كنت نازل السوق مضروب بالجزمة و بعدين لقيت لمة و هليلة و زحمة موت قلت خير اخش في الطابور يمكن يكونوا بيوزعوا فراخ و لا اي حاجة من التموين٠
الاقيلك بتاع خضار و بيبيع طماطم بيقولك من الجديدة بتاعة الاشعاع٠
و ولية قدامي بتقول ان الطماطم دي زي العسل و جابت منها امبارح و اية بتقولك العيال كلوا منها و بقى وشهم احمر زي الدم٠
انا قلت في نفسيتي طيب قشطة انا اصلا كييف سلطة و اجيب بقى شوية للسلطة و الطبيخ يبقى اشعاع مزدوج و ممكن اطير زي سوبرمان بعد يومين٠
على ما وصلت للراجل بعد خناق و ضرب و اية بقى اديته الفلوس و هات يا معلم اتنين كيلو٠
روحت و مش عارف اية اللي حصل نسيت موضوع الطماطم دة خالص و يومين كدة و امي فاتحة الباب عليا و بتقولي: ولة انت جبت طماطم من يومين كدة؟
قلتلها ايوة و الله دا انا نسيتها الطماطم بتاعة الاشعاع٠
قالتلي ربنا ينتقم منك اشوف فيك يوم يا بعيد
قلتلها في اية بس قالتلي ابوك بالليل عجبته طماطمية منها مكلبظة و راح واكلها من غير غسيل و اهو في المستشفى لسة متصلين بيا زمايله بيقولوا حالة تسمم٠
قلتلها طب خلاص يالا نروحله نتفرج عليه٠
و احنا ماشيين باقولها
امال انا و انا معدي على المطبخ كدة
مالقيتش الطماطم ما تعرفيش هي فين؟
٠٠٠٠٠٠٠٠٠
طرررررراخ
جزمة طايشة و لبست في دماغنا.
No comments:
Post a Comment